കാലം മാറുമ്പോൾ മനുഷ്യന്റെ ആശയവിനിമയ ഉപാധികളും മാറുന്നു. നൂറ്റാണ്ടുകൾക്ക് മുൻപ് ഗലീലി കടൽത്തീരത്ത് സുവിശേഷം പ്രസംഗിച്ച അപ്പോസ്തലന്മാരുടെ അതേ ദൗത്യം, ഇന്ന് ഇരുപത്തിയൊന്നാം നൂറ്റാണ്ടിൽ ഇൻസ്റ്റാഗ്രാം റീലുകളിലൂടെയും ഡിജിറ്റൽ കാൻവാസിലൂടെയും തുടരുകയാണ്. കത്തോലിക്കാ വിശ്വാസത്തെ ഇന്നത്തെ തലമുറയുടെ പോപ്പ് സംസ്കാരവുമായി (Pop culture) അതിമനോഹരമായി സമന്വയിപ്പിച്ച് സോഷ്യൽ മീഡിയയിൽ തരംഗം സൃഷ്ടിക്കുകയാണ് ബ്രസീലിയൻ ചിത്രകാരനായ മത്തെയൂസ് സാന്തോസ്. തന്റെ @santocarisma എന്ന ഇൻസ്റ്റാഗ്രാം അക്കൗണ്ടിലൂടെ ലക്ഷക്കണക്കിന് യുവാക്കളുടെ ഹൃദയങ്ങളിലേക്കാണ് ഈ കലാകാരൻ ക്രിസ്തുവിനെ എത്തിക്കുന്നത്.
ഫുട്ബോളും ഫാഷനും സ്നീക്കേഴ്സും നെഞ്ചിലേറ്റുന്ന ഇന്നത്തെ യുവത്വത്തിന് അവരുടെ ഭാഷയിലാണ് മത്തെയൂസ് കത്തോലിക്കാ വിശ്വാസത്തെ പരിചയപ്പെടുത്തുന്നത്. ചെറുപ്പം മുതലേ തനിക്ക് താല്പര്യമുണ്ടായിരുന്ന കായിക സംസ്കാരവും വസ്ത്ര ബ്രാൻഡുകളും തന്റെ ആത്മീയതയുമായി അദ്ദേഹം കോർത്തിണക്കി. റോബർട്ട് പ്രൊവോസ്റ്റ് എന്ന വൈദികൻ പണ്ട് നൈക്കി സ്നീക്കേഴ്സ് ധരിച്ചു നിൽക്കുന്ന ഒരു പഴയ ചിത്രത്തിൽ നിന്നും പ്രചോദനം ഉൾക്കൊണ്ട്, അദ്ദേഹം രൂപകൽപ്പന ചെയ്ത ‘ലെയോ പതിനാലാമൻ മാർപാപ്പ സ്നീക്കേഴ്സ് കൺസെപ്റ്റ്’ സോഷ്യൽ മീഡിയയിൽ പത്തുലക്ഷത്തിലധികം ലൈക്കുകൾ നേടി ചരിത്രം സൃഷ്ടിച്ചു. പരമ്പരാഗതമായ ശൈലികളിൽ നിന്ന് മാറി ചിന്തിച്ചുകൊണ്ട്, മെക്സിക്കൻ കളിക്കാർ ലോകകപ്പ് മത്സരത്തിന് മുൻപ് ഗ്വാഡലൂപ്പ മാതാവിന്റെ രൂപത്തിന് മുന്നിൽ പ്രാർത്ഥിക്കുന്നതും, താരങ്ങൾ മൈതാനത്ത് ദൈവത്തിന് നന്ദി പറയുന്നതുമെല്ലാം മത്തെയൂസ് തന്റെ ചിത്രങ്ങളിലൂടെ ജനങ്ങളിലെത്തിക്കുന്നു.
ആധുനിക സാങ്കേതികവിദ്യയായ ആർട്ടിഫിഷ്യൽ ഇന്റലിജൻസിനെ (AI) ഭയപ്പെടാതെ, അതിനെ തന്റെ സർഗാത്മകതയുടെ ഒരു മികച്ച സഹായിയായി മാറ്റാനും ഈ കലാകാരന് സാധിക്കുന്നുണ്ട്. “AI ഇമേജ് ജനറേഷൻ വരുന്നതിന് മുൻപ്, ഒരു കഥാപാത്രത്തെയോ വസ്തുവിനെയോ ചിത്രീകരിക്കാൻ എനിക്ക് ഒരു പ്രത്യേക ശാരീരിക ഭാവം ആവശ്യമായി വരുമ്പോൾ, ഞാൻ തന്നെ ആ ഭാവത്തിൽ ഫോട്ടോ എടുക്കുകയോ അല്ലെങ്കിൽ എനിക്ക് ആവശ്യമുള്ള ആംഗിളിൽ നിന്ന് ആ വസ്തുവിന്റെ ചിത്രം എടുത്ത് പഠിക്കുകയോ ചെയ്യണമായിരുന്നു. എന്നാൽ ഇന്ന് എനിക്ക് ഒരു ആശയം ഉണ്ടായാൽ, ഒരു നല്ല ‘പ്രോംപ്റ്റ്’ നൽകുന്നതിലൂടെ ഞാൻ സങ്കൽപ്പിച്ചതിന് വളരെ അടുത്തുള്ള ഒരു റഫറൻസ് ചിത്രം ലഭിക്കും. അത് വെച്ച് എനിക്ക് ഘടനയും ഭാവവും പഠിക്കാൻ സാധിക്കും.” അദ്ദേഹം പറയുന്നു.
എങ്കിലും, സാങ്കേതികവിദ്യ ഒരു സഹായി മാത്രമായിരിക്കണമെന്നും ഒരിക്കലും കലാകാരന് പകരമാകരുതെന്നും അദ്ദേഹം വെളിപ്പെടുത്തുന്നു.
ചിത്രങ്ങളുടെ ശാരീരിക ഭാവങ്ങളും ഘടനകളും പഠിക്കാൻ AI പ്രോംപ്റ്റുകൾ ഉപയോഗിക്കുമ്പോഴും, തന്റെ വരകളിലെ തനിമയും ജീവനും സ്വന്തം കൈകളിൽ നിന്ന് തന്നെ വരണമെന്ന് അദ്ദേഹം നിർബന്ധം പിടിക്കുന്നു. ബ്രസീലിന്റെ ആദ്യകാല സുവിശേഷകനായ വിശുദ്ധ ജോസഫ് ഓഫ് അഞ്ചിയേറ്റയെ തന്റെ മധ്യസ്ഥനായി കാണുന്ന മത്തെയൂസ്, അമേരിക്കയിലെ പ്രമുഖ കത്തോലിക്കാ പബ്ലിഷർമാരായ അസെൻഷൻ പ്രസ്സിന് വേണ്ടിയും കുട്ടികളുടെ സുവിശേഷവൽക്കരണത്തിനായുള്ള ഫ്ലാഷ് കാർഡുകൾ രൂപകൽപ്പന ചെയ്തിട്ടുണ്ട്.
ടൂർണമെന്റിൽ കളിക്കാർ പ്രകടിപ്പിച്ച വിശ്വാസ നിമിഷങ്ങളിൽ നിന്ന് പ്രചോദനം ഉൾക്കൊണ്ട് മത്തെയൂസ് നിരവധി ചിത്രങ്ങൾ തയാറാക്കിയിട്ടുണ്ട്. മത്സരത്തിന് മുൻപ് മെക്സിക്കൻ കളിക്കാർ ഗ്വാഡലൂപ്പ മാതാവിന്റെ രൂപത്തിന് മുന്നിൽ പ്രാർഥിക്കുന്നതും, ഒരു ജർമ്മൻ ഫുട്ബോൾ താരം ഗോൾ നേട്ടത്തിന് ശേഷം ദൈവത്തിന് മഹത്വം അർപ്പിക്കുന്നതുമെല്ലാം ഇതിൽ ഉൾപ്പെടുന്നു.
നാം എന്ത് ചെയ്താലും നമ്മുടെ വ്യക്തിപരമായ താല്പര്യങ്ങൾ എന്തായിരുന്നാലും, എല്ലാറ്റിനെയും നമ്മുടെ കർത്താവിനെ സ്നേഹിക്കാനും അവിടുത്തെ മറ്റുള്ളവർക്ക് അറിയിക്കാനുമുള്ള അവസരമാക്കി മാറ്റാൻ കഴിയുമെന്ന് ഓർമ്മിപ്പിക്കുന്ന മനോഹരമായ ഒരു രീതിയാണിത്.
ഈ ഡിജിറ്റൽ മിഷൻ മറ്റുള്ളവരിലേക്ക് വിശ്വാസം പകരുക മാത്രമല്ല, സ്വന്തം ആത്മീയ ജീവിതത്തെയും ഏറെ സ്വാധീനിക്കുന്നുണ്ട്. ഓരോ വിശുദ്ധരെയോ ഭക്തിയെയോ കുറിച്ച് ചിത്രങ്ങൾ വരയ്ക്കുന്നതിന് മുൻപ് അദ്ദേഹം നടത്തുന്ന ആഴത്തിലുള്ള ഗവേഷണങ്ങൾ അദ്ദേഹത്തെ ദൈവത്തോട് കൂടുതൽ അടുപ്പിക്കുന്നു. നാം ചെയ്യുന്ന ജോലികളോ നമ്മുടെ വ്യക്തിപരമായ താല്പര്യങ്ങളോ എന്തുതന്നെയായാലും, അതിനെയെല്ലാം ദൈവത്തെ സ്നേഹിക്കാനും അവിടുത്തെ മഹത്വപ്പെടുത്താനുമുള്ള വലിയ അവസരങ്ങളാക്കി മാറ്റാൻ കഴിയുമെന്നാണ് തന്റെ ജീവിതത്തിലൂടെയും കലയിലൂടെയും ലോകത്തിന് കാണിച്ചുതരുന്നത്.
