അത്ഭുതങ്ങൾ തുടർക്കഥയായി മാറുന്ന വിസ്കോൺസിലെ മരിയൻ ദേവാലയം

    ലോകമെമ്പാടും നിരവധി മരിയൻ തീർത്ഥാടനകേന്ദ്രങ്ങളുണ്ട്. അതിൽ പ്രശസ്തമായ ഒന്നാണ് വിസ്കോൺസിലെ ഔർ ലേഡി ഓഫ് ഗുഡ് ഹെല്പ് ദേവാലയം. ഈ ദേവാലയത്തിൽ അത്ഭുതങ്ങൾ തുടർക്കഥയാകുന്നതും ദൈവത്തിന്റെ പ്രത്യേകമായ കരുതൽ ഇവിടെ എത്തുന്നവരിൽ വെളിപ്പെടുന്നതും 1871-ഓടു കൂടിയാണ്.

    ആ വർഷമാണ് വിസ്കോൺസിനെ നടുക്കിയ തീപിടിത്തം നടക്കുന്നത്. ആളിപ്പടർന്ന തീ നിമിഷനേരങ്ങൾക്കകം വിഴുങ്ങിയത് മില്യൺ കണക്കിന് ഏക്കർ ഭൂമിയാണ്. എന്തുചെയ്യണം എന്നറിയാതെ പകച്ചുനിന്ന ജനങ്ങൾ ഓടിക്കയറിയത് മാതാവിന്റെ ഈ കൊച്ചു ചാപ്പലിലേയ്ക്കാണ്. ചുറ്റും തീ. എന്നാൽ ആ തീയ്ക്ക് മാതാവിന്റെ നാമത്തിലുള്ള ആ ചാപ്പലിനെയോ അതിനു ചുറ്റുമുള്ള അഞ്ച് ഏക്കർ ഭൂമിയെയും തൊടുവാൻ പോലും കഴിഞ്ഞില്ല. ഒരു വലിയ മരുഭൂമിക്ക് നടുവിൽ അവശേഷിച്ച പച്ചപ്പ് പോലെ ആ സ്ഥലവും അവിടെ അഭയം തേടിയവരും അവിടെ ഉണ്ടായിരുന്ന പക്ഷി-മൃഗാദികളും അഗ്നിബാധയെ അതിജീവിച്ചു. ഈ സംഭവത്തോടെ ദൈവത്തിന്റെ ഒരു പ്രത്യേക കരുതൽ, പരിശുദ്ധ അമ്മയുടെ ഒരു പ്രത്യേക സംരക്ഷണം ആ ദേവാലയത്തിനുമേൽ ഉണ്ടെന്ന് ആളുകൾക്ക് മനസിലായി. അതോടെ അവിടേയ്ക്ക് ധാരാളം തീർത്ഥാടകർ കടന്നുവരാൻ തുടങ്ങി.

    ഈയൊരു സംഭവത്തിനുശേഷം അവിടെ അത്ഭുതങ്ങൾ തുടർച്ചയായി നടക്കുന്നതാണ് കാണുവാൻ കഴിഞ്ഞത്. ആ ദേവാലയത്തിലേക്ക് കടന്നുവരുന്ന ഓരോ വിശ്വാസികളും ദൈവത്തിന്റെ സംരക്ഷണം പ്രത്യേകമായ വിധത്തിൽ അനുഭവിച്ചാണ് കടന്നുപോയത്. ഒരിക്കൽ ഒരു സ്ത്രീ അവിടേയ്ക്കു കടന്നുവന്നു. നാൻസി എന്ന് പേരുള്ള ആ സ്ത്രീ, ഇവിടെ എത്തുമ്പോൾ വൈദ്യശാത്രം ഏതാണ്ട് കൈയ്യൊഴിഞ്ഞിരുന്നു – ക്യാൻസർ അവസാനഘട്ടത്തിലും. ഈ ദേവാലയത്തിലെത്തിയ അവർ ഏറെനേരം കരഞ്ഞു പ്രാർത്ഥിച്ചു. മടങ്ങുമ്പോൾ എന്തോ ഒരു വലിയ ഭാരം മനസ്സിൽ നിന്ന് ഒഴിഞ്ഞുപോയതു പോലെ അവർക്ക് തോന്നിയിരുന്നു. ശേഷം നടത്തിയ പരിശോധനയിൽ ഡോക്ടർമാരെപ്പോലും അമ്പരപ്പിച്ചുകൊണ്ട് അവരുടെ ക്യാൻസർ രോഗം പൂർണ്ണമായും മാറിയതായി കണ്ടെത്തി.

    മറ്റൊരിക്കൽ അതായത് 2013-ൽ ഈ ദേവാലയം സന്ദർശിക്കുവാൻ ഒരു കുടുംബം എത്തി. അവരുടെ കൂടെ 18 മാസം പ്രായമുള്ള ഒരു കുഞ്ഞുണ്ടായിരുന്നു. ഈ കുഞ്ഞിന് വായിൽക്കൂടി ഭക്ഷണം കഴിക്കുവാൻ സാധിക്കുമായിരുന്നില്ല. അതിനാൽ ഫീഡിങ് ട്യൂബ് ഇട്ടിരുന്നു. ദേവാലയത്തിൽ കുഞ്ഞിന്റെ സൗഖ്യത്തിനായി പ്രാർത്ഥിച്ചുകൊണ്ടിരുന്നപ്പോൾ ആ ട്യൂബ് പെട്ടന്ന് ഊരിപ്പോന്നു. അവർ ഭയപ്പെട്ടു. പെട്ടന്നുതന്നെ കുഞ്ഞിനെ ആശുപത്രിയിൽ എത്തിച്ചു. ആശുപത്രിയിൽ എത്തിച്ചപ്പോൾ ആ തുള അടഞ്ഞുവെന്നും ഇനി ട്യൂബ് ഇടേണ്ട എന്നും ആശുപത്രി അധികൃതർ വെളിപ്പെടുത്തി.

    ഇതൊന്നുമല്ല, നിരവധി അത്ഭുതങ്ങളാണ് ഈ മാതാവിന്റെ ദേവാലയത്തിൽ നടക്കുന്നത്. വിശ്വാസത്തോടെ കടന്നുവരുന്നവർക്ക് തന്റെ പുത്രനിൽ നിന്നും അനുഗ്രഹങ്ങള്‍ വാങ്ങിനൽകുവാൻ സദാ സന്നദ്ധയാണ് ഇവിടെ പരിശുദ്ധ അമ്മ.

    വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.