തിന്മകളുടെ ഇരുട്ടിൽ യുവാക്കൾ, നന്മയുടെ പ്രകാശവും ശബ്ദവുമായി മാറണമെന്ന് സീറോ മലബാർ സഭാ മേജർ ആർച്ച്ബിഷപ് കർദ്ദിനാൾ മാർ ജോർജ്ജ് ആലഞ്ചേരി ആഹ്വാനം ചെയ്തു. ശ്രീലങ്കയിലെ ഭീകരാക്രമണത്തെ അപലപിച്ച് കെസിവൈഎം സംസ്ഥാന സമിതി പാലാരിവട്ടം പിഒസിയിൽ സംഘടിപ്പിച്ച പ്രാര്ത്ഥനാദീപം തെളിക്കൽ ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തിലെ 32 രൂപതാ കേന്ദ്രങ്ങളിലും ഫൊറോന, മേഖല കേന്ദ്രങ്ങളിലും കെസിവൈഎമ്മിന്റെ നേതൃത്വത്തിൽ ഇന്ന് പ്രാര്ത്ഥനാദീപം തെളിക്കുമെന്ന് അധ്യക്ഷത വഹിച്ച കെസിവൈഎം സംസ്ഥാന പ്രസിഡന്റ് സിറിയക് ചാഴികാടൻ അറിയിച്ചു.
കെസിബിസി ഡെപ്യൂട്ടി സെക്രട്ടറി റവ. ഡോ. വർഗ്ഗീസ് വള്ളിക്കാട്ട്, കെസിവൈഎം സംസ്ഥാന ഡയറക്ടർ ഫാ. സ്റ്റീഫൻ തോമസ് ചാലക്കര, ജനറൽ സെക്രട്ടറി ബിജോ പി. ബാബു, സംസ്ഥാന ഭാരവാഹികളായ ജോസ് റാൽഫ്, തേജസ് മാത്യു കറുകയിൽ, റോസ്മോൾ ജോസ്, എന്നിവർ നേതൃത്വം നൽകി. വിവിധ രൂപതകളിൽനിന്നുള്ള യുവജന നേതാക്കൾ പങ്കെടുത്തു.