യേശുക്രിസ്തുവാണ് സഭയുടെ ശിരസ്സ്. യേശുക്രിസ്തുവാണ് ഏക അധികാരി. യേശുവിന്റെ അധികാരത്തിലുള്ള പങ്കുപറ്റലാണ് അവിടുന്ന് സഭയ്ക്ക് അപ്പസ്തോലന്മാരിലൂടെ നല്കിയിരിക്കുന്ന അധികാരം. കർത്താവ് നല്കിയിരിക്കുന്ന ഈ അധികാരം ശുശ്രൂഷിക്കപ്പെടാനല്ല, മറിച്ച് ശുശ്രൂഷിക്കാൻ വേണ്ടിയാണ്. അതുകൊണ്ട്, അധികാരത്തിന്റെ സ്രോതസും ഉത്തമ മാതൃകയുമായ യേശുവിന്റെ മനോഭാവം സ്വന്തമാക്കുക എന്നതാണ് ക്രിസ്തുശിഷ്യന്റെ പ്രഥമമായ ധർമ്മം. “ഇനിമേൽ ഞാനല്ല ജീവിക്കുന്നത്; ക്രിസ്തുവാണ് എന്നിൽ ജീവിക്കുന്നത്” (ഗലാ. 2:20). ഇതാണ് ശുശ്രൂഷനിർവ്വഹണത്തിന്റെ ആദ്യത്തെ പടി.
താഴ്മയോടെ മറ്റുള്ളവരെ തങ്ങളേക്കാൾ ശ്രേഷ്ഠരായി കരുതുവാനും സ്വന്തം താല്പര്യത്തേക്കാൾ മറ്റുള്ളവരുടെ താല്പര്യങ്ങൾ പരിഗണിക്കാനും നമുക്കാവണം (ഫിലി. 2:3-4). കാരണം, ആത്യന്തികമായി നാമേവരും സ്വർഗ്ഗസ്ഥനായ പിതാവിന്റെ മക്കളാണ്. ഏവരും അവിടുത്തെ ആദ്യജാതനായ ക്രിസ്തുവിൽ സഹോദരരാണ്.
ഫാ. ജോളി കരിമ്പില്‍
