ജൂലൈ 16 : മേരി മഗ്ദലൈന്‍ 

 

ഫ്രാന്‍സിലെ ബാഫ്‌ളോറില്‍ 1756 നവംബര്‍ 28 നായിരുന്നു ജനനം. ചെറുപ്രായത്തില്‍ തന്നെ ദൈവഭക്തിയില്‍ വളര്‍ന്നുവന്ന മേരി, ബനഡിക്റ്റന്‍ മഠത്തില്‍നിന്നാണ് വിദ്യാഭ്യാസം നേടിയത്.

മേരിക്കു പതിനെട്ടു വയസ്സു പ്രായമായപ്പോള്‍ പെണ്‍കുട്ടികള്‍ക്കായി അവള്‍ ഒരു സ്‌കൂള്‍ ആരംഭിച്ചു. പക്ഷേ, ഫ്രഞ്ചുവിപ്ലവമൂലമുണ്ടായ പ്രതികൂല സാഹചര്യത്തില്‍ സ്‌കൂള്‍ പൂട്ടാന്‍ അവള്‍ നിര്‍ബന്ധിതയായി. പക്ഷേ, ഈ കാലഘട്ടങ്ങളില്‍ ഗവണ്‍മെന്റ് നിയമിച്ചിരുന്ന വൈദികരെ അവള്‍ എതിര്‍ക്കുകയും ഒളിവില്‍ കഴിഞ്ഞിരുന്ന കത്തോലിക്കാ വൈദികരെ സഹായിക്കുകയും അവര്‍ക്ക് സ്വഭവനത്തില്‍ അഭയം നല്കുകയും ചെയ്തു. മാത്രമല്ല, പരി. കുര്‍ബാന അര്‍പ്പിക്കുവാനുള്ള സാഹചര്യം അവള്‍ രഹസ്യമായി അവര്‍ക്ക് ഒരുക്കിക്കൊടുത്തിരുന്നു.

1801 ല്‍ കത്തോലിക്കാ സഭയും ഗവണ്‍മെന്റും തമ്മിലുണ്ടാക്കിയ കരാര്‍പ്രകാരം ഗവണ്മെന്റും സഭയും തമ്മില്‍ നിലനിന്നിരുന്ന അനൈക്യം ഒഴിവാകുകയും തല്‍ഫലമായി സഭയില്‍ സമാധാനം പുന:സ്ഥാപിക്കപ്പെടുകയും ചെയ്തു. അതോടെ സഭാംഗങ്ങളില്‍ മന്ദീഭവിച്ചിരുന്ന വിശ്വാസത്തെ പുനരുജ്ജീവിപ്പിക്കുവാനുള്ള ശ്രമങ്ങളില്‍ മേരി അക്ഷീണം പരിശ്രമിച്ചു.

1807 ല്‍ മേരിയും ഒപ്പമുണ്ടായിരുന്നവരും സന്ന്യാസവ്രതവാഗ്ദാനം നടത്തി. ആബര്‍ട്ടായിരുന്ന കബാര്‍ട്ടായിരുന്നു മേരിയുടെയും സഹോദരിമാരുടെയും പ്രവര്‍ത്തനങ്ങള്‍ക്ക് പ്രോത്സാഹനം നല്കിയിരുന്നത്. അങ്ങനെ ‘സിസ്റ്റേഴ്‌സ് ഓഫ് ക്രിസ്ത്യന്‍ സ്‌കൂള്‍സ് ഓഫ് മേഴ്‌സി’ എന്ന സമൂഹത്തിനാരംഭം കുറിച്ചു. മേരി മഗ്ദലെന്‍’ എന്ന നാമമാണ് അവള്‍ സ്വീകരിച്ചത്. പിന്നീട് അവള്‍ സമൂഹത്തിന്റെ അധികാരിയായി നിയമിതയായി. 1815 ല്‍ തൊണ്ണൂറാമത്തെ വയസ്സില്‍ മേരി മരണമടഞ്ഞു. മരണശേഷം മേരിയുടെ മധ്യസ്ഥതയില്‍ നിരവധിയായ അത്ഭുതങ്ങള്‍ പ്രവര്‍ത്തിക്കുവാന്‍ ദൈവം തിരുമനസ്സായി. 1925 ല്‍ മേരിയെ വിശുദ്ധയായി പ്രഖ്യാപിച്ചു.

വിചിന്തനം: ”ലോകത്തിലുള്ള പ്രലോഭനങ്ങളില്‍നിന്ന് പൂര്‍ണ്ണമായും വിമുക്തരായി അങ്ങയെപ്രതി നിന്ദിക്കപ്പെടുവാനും ഈ ലോകത്തില്‍ അജ്ഞാതനായിരിക്കാനും വേണ്ട വരം തന്നരുളണമേ.”

 

ഇതരവിശുദ്ധര്‍ : അത്തനോഗറസ്സ് (+305) രക്തസാക്ഷി / വിറ്റാലിയന്‍ (+776) ഓസിമോയിലെ മെത്രാന്‍ / വുള്‍റാഡ് (+784) പാരീസിലെ ആബട്ട് / വാലെന്റൈന്‍ (305) ട്രെയറിലെ മെത്രാന്‍ / ഡോമിനോ (+295) ലെബര്‍ഡിയിലെ രക്തസാക്ഷി /ഹീലിയര്‍ (ആറാം നൂറ്റാണ്ട്).

 

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.