അമേരിക്കയിലെ വടക്കൻ നെവാഡയിൽ അതിവേഗം പടർന്നുപിടിക്കുന്ന കാട്ടുതീയെ തുടർന്ന് ആയിരക്കണക്കിന് ആളുകൾ വീടൊഴിയേണ്ടി വന്ന സാഹചര്യത്തിൽ, ദുരന്തബാധിതർക്ക് ആശ്വാസവും അഭയവുമേകി രംഗത്തെത്തിയിരിക്കുകയാണ് പ്രാദേശിക കത്തോലിക്കാ ദൈവാലയങ്ങൾ. ജനങ്ങളെ സഹായിക്കുന്നതിനായി ദൈവാലയങ്ങളുടെ വാതിലുകൾ തുറന്നുകൊടുക്കുകയും വിപുലമായ ദുരിതാശ്വാസ പ്രവർത്തനങ്ങൾ ആരംഭിക്കുകയും ചെയ്തിരിക്കുകയാണ് ഇവിടെയുള്ള റെനോ (Reno) രൂപത.
കാട്ടുതീ ഭീഷണിയെ തുടർന്ന് ഒഴിപ്പിക്കപ്പെട്ട കുടുംബങ്ങൾക്കും സുരക്ഷിത സ്ഥാനം തേടുന്നവർക്കും താൽക്കാലിക താമസവും ഭക്ഷണവും അടിസ്ഥാന സൗകര്യങ്ങളും ദൈവാലയ പാരിഷ് ഹാളുകളിൽ ഒരുക്കിയിട്ടുണ്ട്. കൂടാതെ ദുരന്തത്തിൽ സർവതും നഷ്ടപ്പെടുമെന്ന ഭീതിയിൽ കഴിയുന്ന ജനങ്ങൾക്ക് ഭക്ഷണവും വസ്ത്രവും നൽകുന്നതിനൊപ്പം അവർക്ക് ആശ്വാസമേകാൻ വൈദികരുടെയും സന്നദ്ധ പ്രവർത്തകരുടെയും നേതൃത്വത്തിൽ പ്രാർഥനകളും കൗൺസിലിംഗും നൽകുന്നുണ്ട്.
“ദുരന്തമുഖത്ത് പ്രയാസമനുഭവിക്കുന്ന നമ്മുടെ സഹോദരങ്ങൾക്ക് ആശ്വാസമാകുക എന്നത് സഭയുടെ കടമയാണ്. സുരക്ഷിതത്വം തേടുന്ന ഏവർക്കുമായി നമ്മുടെ ദൈവാലയ വാതിലുകൾ തുറന്നിട്ടിരിക്കുകയാണ്,” രൂപതാ അധികൃതർ വ്യക്തമാക്കി.
കാട്ടുതീ നിയന്ത്രണവിധേയമാക്കാനും പ്രദേശവാസികളുടെ സുരക്ഷയ്ക്കുമായി പ്രത്യേക പ്രാർഥനകൾ നടത്താൻ ബിഷപ്പ് ആഹ്വാനം ചെയ്തിട്ടുണ്ട്. രക്ഷാപ്രവർത്തനം നടത്തുന്ന അഗ്നിശമന സേനാംഗങ്ങൾക്കും സുരക്ഷാ ജീവനക്കാർക്കും പിന്തുണയുമായി നിരവധി സന്നദ്ധ പ്രവർത്തകരാണ് ദൈവാലയ കേന്ദ്രങ്ങളിൽ കേന്ദ്രീകരിച്ചിരിക്കുന്നത്.
