അമേരിക്കയും ഇറാനും തമ്മിൽ നിലനിൽക്കുന്ന പുതിയ രാഷ്ട്രീയ-സൈനിക സംഘർഷങ്ങളിൽ ആഴത്തിലുള്ള ആശങ്ക രേഖപ്പെടുത്തി ലെയോ പതിനാലാമൻ മാർപാപ്പ. ഇരു രാജ്യങ്ങളും തമ്മിലുള്ള ശത്രുത വർധിക്കുന്നത് ആഗോള സമാധാനത്തിന് ഭീഷണിയാണെന്ന് ചൂണ്ടിക്കാണിച്ച പാപ്പ, എത്രയും വേഗം ചർച്ചകളുടെ പാതയിലേക്ക് തിരിച്ചുവരാൻ ഇരുപക്ഷത്തോടും ആഹ്വാനം ചെയ്തു.
വത്തിക്കാനിൽ നടത്തിയ പ്രത്യേക പ്രഭാഷണത്തിലാണ് അന്താരാഷ്ട്ര സമൂഹത്തെ ഉറ്റുനോക്കുന്ന ഈ വിഷയത്തിൽ മാർപാപ്പ തന്റെ നിലപാട് വ്യക്തമാക്കിയത്.
ആയുധങ്ങളും ഭീഷണികളും വഴി പ്രശ്നങ്ങൾ പരിഹരിക്കാൻ ശ്രമിക്കുന്നത് കൂടുതൽ ദുരന്തങ്ങളിലേക്ക് മാത്രമേ നയിക്കൂ എന്ന് ഓർമ്മിപ്പിച്ച പാപ്പ, പ്രതിസന്ധികൾ മറികടക്കാൻ നയതന്ത്രപരമായ ചർച്ചകളും സമാധാനപരമായ സംഭാഷണങ്ങളും അനിവാര്യമാണ് എന്ന് പറഞ്ഞു. പശ്ചിമേഷ്യയിൽ വീണ്ടുമൊരു യുദ്ധസാഹചര്യം ഉണ്ടാകാതിരിക്കാൻ ഇരു രാജ്യങ്ങളും പരമാവധി ശ്രമിക്കണം എന്നും പാപ്പ ആവശ്യപ്പെട്ടു.
അക്രമത്തിന്റെ പാത വെടിഞ്ഞ്, പരസ്പര ബഹുമാനത്തോടെയും അന്താരാഷ്ട്ര നിയമങ്ങൾ അനുസരിച്ചും പ്രശ്നപരിഹാരത്തിന് ശ്രമിക്കണമെന്ന് പാപ്പ യുഎസിനോടും ഇറാനോടും അഭ്യർഥിച്ചു. തർക്കങ്ങൾ ലഘൂകരിക്കുന്നതിനും മേഖലയിൽ ശാശ്വതമായ സമാധാനം പുനഃസ്ഥാപിക്കുന്നതിനും വേണ്ടി ലോകമെമ്പാടുമുള്ള വിശ്വാസികൾ പ്രാർഥിക്കണമെന്നും വത്തിക്കാൻ ആസ്ഥാനത്തു നിന്നും മാർപാപ്പ സന്ദേശം നൽകി. കത്തോലിക്കാ സഭ എപ്പോഴും സമാധാന ശ്രമങ്ങൾക്ക് ഒപ്പമുണ്ടാകുമെന്നും അന്താരാഷ്ട്ര തലത്തിൽ സമാധാനം ഉറപ്പാക്കാൻ ലോകരാജ്യങ്ങൾ ഒരുമിച്ച് നിൽക്കണമെന്നും പാപ്പ കൂട്ടിച്ചേർത്തു.
