വി. പത്രോസ്, പൗലോസ് ശ്ലീഹന്മാരുടെ തിരുനാളിനോടനുബന്ധിച്ച് വർണ്ണാഭമായ പൂക്കളങ്ങളാൽ അലംകൃതമായി വത്തിക്കാൻ നഗരം. ജൂൺ 29 ന് വി. പത്രോസ്, പൗലോസ് ശ്ലീഹന്മാരുടെ തിരുനാൾ ദിനത്തിൽ വത്തിക്കാനിലെ പ്രശസ്തമായ ‘വിയാ ഡെല്ല കൺചില്യാസിയോനെ’ തെരുവ് പൂർണ്ണമായും അതിമനോഹരമായ പൂക്കളങ്ങളാൽ അലങ്കരിക്കപ്പെട്ടു.
ജൂൺ 28 ഞായറാഴ്ച സൂര്യാസ്തമയം മുതൽ ഇറ്റലിയുടെ വിവിധ ഭാഗങ്ങളിൽ നിന്നുള്ള നൂറുകണക്കിന് കലാകാരന്മാരും സന്നദ്ധപ്രവർത്തകരും രാപ്പകലില്ലാതെ അധ്വാനിച്ചാണ് ഈ പുഷ്പവിസ്മയം തീർത്തത്. ഉണങ്ങിയ പൂവിതളുകൾ, മരപ്പൊടി, വർണ്ണമണൽ എന്നിവ ഉപയോഗിച്ച് യേശുക്രിസ്തു, കന്യകാമറിയം, അപ്പസ്തോലന്മാർ എന്നിവരുടെ ചിത്രങ്ങളാണ് തെരുവിൽ പുനർജനിച്ചത്. വത്തിക്കാനിലേക്ക് ഒഴുകിയെത്തിയ ആയിരക്കണക്കിന് തീർഥാടകർക്ക് ഈ ദൃശ്യം ഭക്തിസാന്ദ്രമായ അനുഭവമായി.
1625 ൽ വത്തിക്കാനിലെ പുഷ്പാലങ്കാര ചുമതലക്കാരനായിരുന്ന ബെനഡെറ്റോ ഡ്രേയ് തുടക്കം കുറിക്കുകയും പിന്നീട് പ്രശസ്ത ശിൽപി ജിയാൻ ലോറെൻസോ ബെർണിനി പ്രശസ്തമാക്കുകയും ചെയ്ത ചരിത്രപ്രസിദ്ധമായ ‘ഇൻഫിയൊറാറ്റ’ പാരമ്പര്യത്തിന്റെ പുനരാവിഷ്കാരമാണിത്. കാലാന്തരത്തിൽ വിസ്മൃതിയിലാണ്ടുപോയ ഈ ആചാരം 2011 മുതലാണ് റോമിലെ സാംസ്കാരിക സംഘടനകൾ വീണ്ടും സജീവമാക്കിയത്. തിരുനാൾ ദിനത്തിൽ വത്തിക്കാനിലെത്തുന്ന വിശ്വാസികൾക്ക് ആത്മീയവും ദൃശ്യപരവുമായ വലിയൊരു വിരുന്നാണ് ഈ പുഷ്പാലങ്കാരം സമ്മാനിച്ചത്.
