കൊളംബിയയുടെ പുതിയ പ്രസിഡന്റായി തിരഞ്ഞെടുക്കപ്പെട്ട അബെലാർഡോ ഡി ലാ എസ്പ്രിയേല രാജ്യത്തിന്റെ കാവൽപാലകയായ ‘ചിക്വിൻക്വിറയിലെ ഔവർ ലേഡി ഓഫ് ദി റോസറി’ (Our Lady of the Rosary of Chiquinquirá) മാതാവിന് സമർപ്പിച്ചു. ജൂലൈ ഒമ്പതിന് നടന്ന ചിക്വിൻക്വിറ മാതാവിന്റെ തിരുനാൾ ദിനത്തിലാണ് നിയുക്ത പ്രസിഡന്റ് ഈ ആത്മീയ സമർപ്പണം നടത്തിയത്. തന്റെ വരാനിരിക്കുന്ന ഭരണകാലയളവിൽ രാജ്യത്ത് സമാധാനവും ഐക്യവും നിലനിർത്താൻ ആവശ്യമായ ജ്ഞാനവും അനുഗ്രഹവും നൽകണമെന്ന് അദ്ദേഹം മാതാവിനോട് പ്രാർത്ഥിച്ചു.
കൊളംബിയയിൽ അടുത്തിടെ സമാപിച്ച പ്രസിഡന്റ് തിരഞ്ഞെടുപ്പിലെ രണ്ടാം ഘട്ട വോട്ടെടുപ്പിൽ ഇടതുപക്ഷ സ്ഥാനാർഥി ഇവാൻ സെപെഡയെ പരാജയപ്പെടുത്തിയാണ് അബെലാർഡോ ഡി ലാ എസ്പ്രിയേല വിജയിച്ചത്. വരുന്ന നാലുവർഷം അബെലാർഡോയുടെ നേതൃത്വത്തിലായിരിക്കും ഭരണം നടക്കുക.
ഓഗസ്റ്റ് ഏഴിന് നടക്കുന്ന ഔദ്യോഗിക സത്യപ്രതിജ്ഞാ ചടങ്ങിന് മുന്നോടിയായാണ് രാജ്യത്തെ ദശലക്ഷക്കണക്കിന് കത്തോലിക്കാ വിശ്വാസികളുടെ പ്രധാന തീർത്ഥാടന കേന്ദ്രമായ ചിക്വിൻക്വിറയിലെ ബസിലിക്കയിൽ അദ്ദേഹം എത്തിയത്. കൊളംബിയൻ ജനത നേരിടുന്ന ഭിന്നതകളും അക്രമങ്ങളും അവസാനിപ്പിക്കാനും, ദാരിദ്ര്യ നിർമ്മാർജ്ജനത്തിനും ജനക്ഷേമത്തിനുമായി വിട്ടുവീഴ്ചയില്ലാത്ത ഭരണരീതി കാഴ്ചവെയ്ക്കാനും തനിക്ക് സാധിക്കട്ടെയെന്ന് അദ്ദേഹം പ്രാർത്ഥനാപൂർവ്വം ആശംസിച്ചു. കൊളംബിയയിലെ സഭാനേതൃത്വവും ബിഷപ്പുമാരും ഈ പ്രത്യേക പ്രാർത്ഥനാ ചടങ്ങിൽ പങ്കെടുത്തു.
