കേരളത്തിൽ വരും ദിവസങ്ങളിൽ കാലവർഷത്തിന് പിന്നാലെ തുലാവർഷം എത്തുന്നതോടെ മഴ ശക്തമാകാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. അടുത്ത രണ്ട് മൂന്ന് ദിവസങ്ങൾക്കുള്ളിൽ തെക്കൻ സംസ്ഥാനങ്ങളിൽ മഴയ്ക്ക് അനുകൂലമായ സാഹചര്യങ്ങൾ ഉണ്ടാകും. ഒക്ടോബർ 15 മുതൽ ഒക്ടോബർ 18 വരെയുള്ള ദിവസങ്ങളിൽ സംസ്ഥാനത്ത് വ്യാപകമായി ശക്തമായ മഴ ലഭിക്കുമെന്നാണ് പ്രവചനം.
വടക്കൻ ജില്ലകളെ അപേക്ഷിച്ച് മധ്യ, തെക്കൻ കേരളത്തിൽ സാധാരണയിൽ കൂടുതൽ മഴ ലഭിക്കാൻ സാധ്യതയുണ്ടെന്ന് അധികൃതർ വ്യക്തമാക്കി. തിരുവനന്തപുരം ഉൾപ്പെടെയുള്ള തെക്കൻ ജില്ലകളിലാണ് തുലാവർഷത്തിൽ കൂടുതൽ മഴ ലഭിക്കാറുള്ളത്. കഴിഞ്ഞ ഇടവപ്പാതിയിൽ പ്രതീക്ഷിച്ചത്ര മഴ ലഭിക്കാത്തതിനാൽ വരും ദിവസങ്ങളിലെ മഴ സംസ്ഥാനത്തിന്‌ ആശ്വാസമാകും.
വരും ദിവസങ്ങളിൽ ചിലയിടങ്ങളിൽ ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് മുന്നറിയിപ്പുണ്ട്. അടുത്ത രണ്ട് ദിവസം മഴയുടെ അളവ് കുറവായിരിക്കുമെങ്കിലും വ്യാഴാഴ്ച മുതൽ മഴ വീണ്ടും കനക്കും. മഴ മുന്നറിയിപ്പുകളുടെ അടിസ്ഥാനത്തിൽ ആവശ്യമായ മുൻകരുതലുകൾ എടുക്കാൻ കാലാവസ്ഥാ വകുപ്പ് നിർദേശിച്ചു.
