ജനനനിരക്ക് അപകടകരമാംവിധം കുറയുന്ന ഈ കാലത്ത്, മിഡ് വൈഫ് ആകാനുള്ള വിളി ‘ജീവന്റെ സംഗീതമാണ് ‘- ഫ്രാൻസിസ് പാപ്പ. ഇറ്റലിയിലെ കലാബ്രിയയിൽ നിന്നുള്ള ആരോഗ്യ പ്രവർത്തകരുടെയും ഗൈനക്കോളജിസ്റ്റുകളുടെയും മിഡ് വൈഫ്സിന്റെയും സംഘത്തെ സ്വീകരിച്ച് സംസാരിക്കുകയായിരുന്നു പാപ്പ. ഫെബുവരി ആറാം തിയതി കാസാ സാന്റാ മാർത്തായിലാണ് ഈ കൂടിക്കാഴ്ച നടന്നത്.
“നിങ്ങളുടെ ജോലി വിസ്മയകരവും ഒരു ദൈവിളിയുമാണ്. അത് ജീവന്റെ സ്തോത്രഗീതമാണ് പ്രത്യേകിച്ച് ഇത്തരമൊരു കാലഘട്ടത്തിൽ”- മിഡ് വൈഫ്സിനെയും ഡോക്ടേഴ്സിനെയും അഭിസംബോധന ചെയ്തുകൊണ്ടാരംഭിച്ച പ്രസംഗത്തിൽ പാപ്പ ഓർമ്മിപ്പിച്ചു..
അമ്മയും അപ്പനുമാകാനുള്ള, ഇറ്റലിയിലെയും മറ്റു രാജ്യങ്ങളിലെയും ജനങ്ങളുടെ വിമുഖതയെ പാപ്പ വിമർശിച്ചു. “സന്തോഷത്തിന്റെയും ക്രിയാത്മകതയുടെയും പുതിയ ചക്രവാളങ്ങൾ തുറക്കാനുള്ള അവസരമായി ഇതിനെ കാണാതെ, അതൊരു ഭാരമായിട്ടാണ് എല്ലാവരും കാണുന്നത്” – പാപ്പ പറഞ്ഞു.
അവരുടെ ജീവിതത്തിന്റെയും നിയോഗത്തിന്റെയും വിജയത്തിനായി മൂന്നു കാര്യങ്ങൾ പാപ്പ പങ്കുവച്ചു: പ്രൊഫഷണലിസം, ഹ്യുമൻ സെൻസിറ്റിവിറ്റി, പ്രാർഥന
“നിരന്തരമുള്ള നൈപുണ്യ വികസനം ജോലിയിലുള്ള ധാർമ്മികതയുടെ മാത്രം ഭാഗമല്ല, അത്മായ വിശുദ്ധിയുടെ പാതയുമാണ്” – പ്രൊഫഷണലിസത്തെ പാപ്പ വിശദീകരിച്ചു.
ഒരു കുഞ്ഞു പിറക്കുന്നസമയം അമ്മ വളരെ ദുർബലമായ അവസ്ഥയിലാണ്. ആ സമയത്ത് അവരോട് വളരെ സെൻസിറ്റീവായി പെരുമാറേണ്ടതുണ്ട്. സെൻസിറ്റിവിറ്റിയുള്ളവർക്ക് ഈ ജോലി നന്നായി ചെയ്യാൻ കഴിയും.
ഒരു രഹസ്യ മരുന്നാണ് പ്രാർഥന എന്നു നിർവചിച്ച പാപ്പ, ‘ആത്മാവിനെ സുഖപ്പെടുത്തുന്ന മരുന്നാണത്’ എന്നു ഓർമ്മിപ്പിച്ചു. ദൈവം തങ്ങളുടെ മുമ്പിൽ കൊണ്ടെത്തിക്കുന്ന മാതാപിതാക്കൾക്കും കുട്ടികൾക്കുംവേണ്ടി നിരന്തരം പ്രാർഥിക്കണമെന്നും പാപ്പ അവരോട് പറഞ്ഞു.
