ആഫ്രിക്കൻ രാജ്യങ്ങളിലെ ഗ്രാമീണ മേഖലകളിൽ പ്രാഥമിക ആരോഗ്യ സംരക്ഷണം ലഭ്യമാക്കാൻ പ്രവർത്തിക്കുന്ന പ്രമുഖ ജീവകാരുണ്യ സംഘടനയ്ക്ക് 2026-ലെ ‘കോൺറാഡ് എൻ. ഹിൽട്ടൺ ഹ്യൂമാനിറ്റേറിയൻ പ്രൈസ്’ ലഭിച്ചു. ‘ലാസ്റ്റ് മൈൽ ഹെൽത്ത്’ എന്ന സംഘടനയാണ് ഈ പുരസ്കാരത്തിനായി തിരഞ്ഞെടുക്കപ്പെട്ടത്. ലോകത്തിലെ ഏറ്റവും ഉയർന്ന തുകയുടെ (2.5 മില്യൺ ഡോളർ – ഏകദേശം 20 കോടിയോളം ഇന്ത്യൻ രൂപ) ജീവകാരുണ്യ പുരസ്കാരമാണിത്.
അടിസ്ഥാന ആരോഗ്യ സേവനങ്ങൾ പോലുമില്ലാത്ത ആഫ്രിക്കൻ ഗ്രാമങ്ങളിലെ സാധാരണക്കാരിലേക്ക്, പ്രത്യേകിച്ച് സ്ത്രീകളിലേക്കും കുട്ടികളിലേക്കും മികച്ച ചികിത്സയും രോഗപ്രതിരോധ മാർഗങ്ങളും എത്തിക്കുന്നതിൽ ഈ സംഘടന നൽകിയ മികച്ച സംഭാവനകളെ മുൻനിർത്തിയാണ് പുരസ്കാരം. ഗ്രാമീണ മേഖലകളിൽ നിന്നുള്ള പ്രാദേശികവാസികളെ ‘കമ്മ്യൂണിറ്റി ഹെൽത്ത് വർക്കർമാരായി’ പരിശീലിപ്പിച്ച് വീടുകൾ തോറും ആരോഗ്യ സേവനങ്ങൾ എത്തിക്കുകയാണ് ഈ സംഘടന ചെയ്യുന്നത്.
മാതൃ-ശിശു മരണനിരക്ക് കുറയ്ക്കാനും ന്യുമോണിയ, മലേറിയ തുടങ്ങിയ പടർന്നുപിടിക്കുന്ന രോഗങ്ങളെ കൃത്യസമയത്ത് പ്രതിരോധിക്കാനും ഇവരുടെ പ്രവർത്തനങ്ങളിലൂടെ സാധിച്ചു. “ഏറ്റവും ദരിദ്രവും ഒറ്റപ്പെട്ടതുമായ സമൂഹങ്ങൾക്ക് പ്രാഥമിക ചികിത്സയും ജീവൻ രക്ഷാ ഉപാധികളും ഉറപ്പാക്കാൻ ഇവർ കാണിച്ച സമാനതകളില്ലാത്ത പ്രതിബദ്ധതയാണ് ഈ വലിയ അംഗീകാരത്തിന് കാരണം,” ഹിൽട്ടൺ ഫൗണ്ടേഷൻ വ്യക്തമാക്കി.
ഈ പുരസ്കാര തുക ഉപയോഗിച്ച് കൂടുതൽ ഉൾനാടൻ പ്രദേശങ്ങളിലേക്ക് തങ്ങളുടെ സേവനങ്ങൾ വിപുലീകരിക്കാനും ആയിരക്കണക്കിന് പുതിയ ഹെൽത്ത് വർക്കർമാർക്ക് പരിശീലനം നൽകാനും പദ്ധതിയിടുന്നതായി സംഘടനയുടെ ഭാരവാഹികൾ അറിയിച്ചു. കത്തോലിക്കാ സന്യാസിനികളും വിവിധ സന്നദ്ധ സംഘടനകളും ആഫ്രിക്കൻ ഭൂഖണ്ഡത്തിൽ നടത്തിവരുന്ന സാമൂഹിക-ആരോഗ്യ പ്രവർത്തനങ്ങൾക്ക് വലിയൊരു പ്രചോദനമാണ് ഈ അന്താരാഷ്ട്ര പുരസ്കാരം.
