ഈശോസഭാ (ജെസ്യൂട്ട്) സന്ന്യാസ സമൂഹത്തിന്റെ സുപ്പീരിയർ ജനറൽ ഫാ. ആർതുറോ സോസ (Fr. Arturo Sosa SJ) ലെയോ പതിനാലാമൻ മാർപാപ്പയുമായി വത്തിക്കാനിൽ കൂടിക്കാഴ്ച നടത്തി. വത്തിക്കാനിലെ ഔദ്യോഗിക വസതിയിൽ വച്ചായിരുന്നു കൂടിക്കാഴ്ച. വത്തിക്കാനും ജെസ്യൂട്ട് സമൂഹവും തമ്മിലുള്ള ദീർഘകാല ചരിത്രപരവും ആത്മീയബന്ധവും ഊട്ടിയുറപ്പിക്കുന്നതായിരുന്നു ഈ കൂടിക്കാഴ്ചയെന്ന് വത്തിക്കാൻ വൃത്തങ്ങൾ അറിയിച്ചു.
സഭയുടെ ആഗോള ദൗത്യങ്ങൾ, ആഗോളതലത്തിൽ ഈശോസഭ നടത്തുന്ന ജീവകാരുണ്യ-വിദ്യാഭ്യാസ പ്രവർത്തനങ്ങൾ, നിലവിലെ ആഗോള വെല്ലുവിളികൾ എന്നിവ കൂടിക്കാഴ്ചയിൽ ചർച്ചയായി. ഏഷ്യ, ആഫ്രിക്ക, ലാറ്റിൻ അമേരിക്ക തുടങ്ങിയ മേഖലകളിൽ സഭ നേരിടുന്ന വിവിധ വിഷയങ്ങളെക്കുറിച്ചും പാർശ്വവത്കരിക്കപ്പെട്ടവരുടെ ക്ഷേമത്തിനായി ഈശോസഭ നടപ്പിലാക്കുന്ന പദ്ധതികളെക്കുറിച്ചും ഫാ. ആർതുറോ സോസ വിശദീകരിച്ചു.
2016-ൽ ഇറ്റലിക്ക് പുറത്തുനിന്നും ലാറ്റിൻ അമേരിക്കയിൽ നിന്നും ഈശോസഭയുടെ തലവനായി (സുപ്പീരിയർ ജനറൽ) തിരഞ്ഞെടുക്കപ്പെടുന്ന ആദ്യ വ്യക്തിയാണ് വെനസ്വേലക്കാരനായ ഫാ. ആർതുറോ സോസ. സഭയുടെ മുന്നോട്ടുള്ള പ്രവർത്തനങ്ങളിൽ പരിശുദ്ധ സിംഹാസനത്തിന്റെ പൂർണ്ണ പിന്തുണയും മാർഗനിർദേശങ്ങളും അദ്ദേഹം കൂടിക്കാഴ്ചയിൽ അഭ്യർഥിച്ചു.
