“എന്റെ തല ലക്ഷ്യമിട്ട് വന്ന കോടാലിയേറ് ഞാൻ കൈകൾ കൊണ്ട് തടഞ്ഞു. സഹപ്രവർത്തകരുടെ പേര് വിളിച്ച് ഞാൻ അലമുറയിട്ട് കരഞ്ഞു,” മരണത്തിന്റെ വക്കിൽ നിന്ന് അദ്ഭുതകരമായി ജീവിതത്തിലേക്ക് തിരിച്ചെത്തിയ ഫ്ലൈദുബായ് വിമാനത്തിന്റെ ക്യാപ്റ്റൻ സ്മിത് മച്ചാർ, താൻ നേരിട്ട ഭീകരനിമിഷത്തെക്കുറിച്ച് പറയുന്നത് ഇപ്രകാരമാണ്. മരണം മുന്നിൽ കലിതുള്ളി നിന്നപ്പോൾ ജീവിതത്തിലേക്ക് തിരികെയെത്താൻ ആ കോക്പിറ്റിൽ പൊരുതിയ നിമിഷങ്ങൾ ഇപ്പോഴും പേടിയോടെയാണ് മച്ചാർ ഓർത്തെടുക്കുന്നത്.
ഭീതിയോടെ മാത്രം ഓർക്കുന്ന നിമിഷം
വിമാനം സൗദി വ്യോമാതിർത്തിയിലൂടെ പറക്കുമ്പോഴാണ് മച്ചാറിന്റെ ജീവിതത്തിലേക്ക് മരണത്തിന്റെ രൂപത്തിൽ കോടാലിയുമായി കോ-പൈലറ്റ് ചാടിവീണത്. തലയിലേറ്റ ആദ്യത്തെ അടിയിൽ, അത് വിമാനത്തിന്റെ സാങ്കേതിക തകരാറാണെന്നാണ് അദ്ദേഹം കരുതിയത്. എന്നാൽ, നിമിഷനേരത്തിനുള്ളിൽ അതൊരു കൊലപാതക ശ്രമമാണെന്ന് മച്ചാർ തിരിച്ചറിഞ്ഞു.
“ബെൽറ്റ് അഴിച്ചുമാറ്റി അവിടെ നിന്നും രക്ഷപെടാൻ ഞാൻ ശ്രമിച്ചു. എന്റെ തല ലക്ഷ്യമിട്ട് വന്ന കോടാലി, കൈകൾ കൊണ്ട് ഞാൻ തടഞ്ഞു. ഇതിനിടയിലും എന്റെ കൈകൾ കോക്പിറ്റ് വാതിലിന്റെ പിടുത്തത്തിലേക്ക് നീണ്ടു. സഹപ്രവർത്തകരുടെ പേരെടുത്ത് വിളിച്ച് ഞാൻ അലമുറയിട്ട് കരഞ്ഞു. ആ നിമിഷമാണ് എനിക്ക് ബോധം നഷ്ടപ്പെട്ടത്,” അബുദാബിയിലെ ആശുപത്രിക്കിടക്കയിലിരുന്ന് അന്ന് നടന്ന ഭീകരനിമിഷങ്ങൾ അദ്ദേഹം ഓർത്തെടുത്തു.
ആക്രമണത്തിനിടയിൽ വെറും 30 സെക്കൻഡിനുള്ളിൽ 16,000 അടി താഴ്ചയിലേക്കാണ് ആ വിമാനം കൂപ്പുകുത്തിയത്. വിമാനത്തിന്റെ മൂക്ക് കുത്തനെ താഴേക്ക് താഴുന്നത് അനുഭവിച്ച ആ നിമിഷങ്ങളെക്കുറിച്ച് അദ്ദേഹം പറയുന്നു: “ഞാൻ ജീവനോടെ തിരിച്ചെത്തുമെന്ന് എനിക്ക് ഉറപ്പില്ലായിരുന്നു. പക്ഷേ, തോറ്റുകൊടുക്കാൻ ഞാൻ തയ്യാറായിരുന്നില്ല.”
മറ്റുള്ളവരുടെ സമയോചിതമായ ഇടപെടൽ കൊണ്ടും ക്യാപ്റ്റൻ സ്മിത് മച്ചാറിന്റെ അവസാന നിമിഷം വരെയുള്ള ആത്മധൈര്യം കൊണ്ടുമാണ് നൂറുകണക്കിന് യാത്രികരുടെ ജീവൻ രക്ഷപെട്ടത്. പരിക്കേറ്റ ശരീരവുമായി ആശുപത്രിയിൽ കഴിയുമ്പോഴും വലിയൊരു ദുരന്തം ഒഴിവാക്കാനായതിന്റെ ആശ്വാസത്തിലാണ് ധീരനായ ഈ പൈലറ്റ്. മനുഷ്യന്റെ ഇച്ഛാശക്തിക്കു മുന്നിൽ മരണത്തിനു പോലും തോൽവി സമ്മതിക്കേണ്ടി വരുമെന്നതിന്റെ ജീവിക്കുന്ന തെളിവാണ് ക്യാപ്റ്റൻ സ്മിത് മച്ചാറിന്റെ ഈ അതിജീവനം.
