ഒരു ദിവസം നമുക്ക് എത്ര മണിക്കൂറുകളാണുള്ളത്? എല്ലാവർക്കും ഒരേ 24 മണിക്കൂർ! എന്നാൽ ചിലർ ഈ സമയത്തിനുള്ളിൽ ഒരുപാട് കാര്യങ്ങൾ നേടുമ്പോൾ മറ്റു ചിലർക്ക് ഒന്നും ചെയ്യാനായില്ലെന്ന തോന്നലായിരിക്കും ബാക്കി. എന്താണ് ഇതിന് കാരണം? സമയത്തിന്റെ കുറവല്ല, ലഭിക്കുന്ന സമയം നാം എങ്ങനെ ഉപയോഗിക്കുന്നു എന്നതാണ് പ്രധാനം. പണവും സമ്പത്തും നഷ്ടപ്പെട്ടാൽ ഒരുപക്ഷേ തിരിച്ചുപിടിക്കാം. എന്നാൽ കടന്നുപോയ ഒരു നിമിഷം പോലും തിരികെ കൊണ്ടുവരാൻ ആർക്കും കഴിയില്ല. ജീവിതത്തിൽ നമുക്ക് ലഭിച്ചിട്ടുള്ളതിൽവച്ച് ഏറ്റവും വിലയേറിയ സമ്മാനമാണ് സമയം. അതിനെ എങ്ങനെ ഉപയോഗിക്കുന്നു എന്നതനുസരിച്ചാണ് നമ്മുടെ ജീവിതത്തിന്റെ മനോഹാരിതയും വിജയവും നിർണയിക്കപ്പെടുന്നത്.
സമയത്തിന്റെ പാഠങ്ങളും പുതിയ പ്രതീക്ഷകളും
സമയം നല്ലൊരു ഗുരുവാണ്. ജീവിതത്തിലെ ഓരോ അനുഭവത്തിലൂടെയും അത് നമ്മെ പലതും പഠിപ്പിക്കുന്നു. ചിലപ്പോൾ സന്തോഷത്തിന്റെ നിമിഷങ്ങൾ സമ്മാനിക്കുമ്പോൾ മറ്റു ചിലപ്പോൾ വേദനകളും നിരാശകളും നേരിടേണ്ടിവരും. എന്നാൽ കാലം കടന്നുപോകുമ്പോൾ പല മുറിവുകളും ഉണങ്ങുകയും പ്രയാസകരമായ അനുഭവങ്ങൾ നമ്മെ കൂടുതൽ കരുത്തുള്ളവരാക്കുകയും ചെയ്യും.
ഇന്ന് അസാധ്യമെന്ന് തോന്നുന്ന പല കാര്യങ്ങളും നാളെ സാധ്യമായേക്കാം. പുതിയ തുടക്കങ്ങൾക്കും തിരുത്തലുകൾക്കും വളർച്ചയ്ക്കും ഓരോ ദിവസവും നമുക്ക് അവസരമുണ്ട്. കഴിഞ്ഞുപോയതിനെക്കുറിച്ച് ഓർത്ത് വിഷമിക്കുന്നതിനുപകരം ഇന്ന് ലഭിച്ചിരിക്കുന്ന സമയത്തെ നല്ല രീതിയിൽ ഉപയോഗിക്കുകയാണ് വേണ്ടത്.
നാളെയെന്ന് പറഞ്ഞ് ഇന്നിനെ നഷ്ടപ്പെടുത്തരുത്
‘നാളെ ചെയ്യാം’ എന്നൊരു ചിന്തകൊണ്ട് എത്രയോ നല്ല അവസരങ്ങൾ നാം മാറ്റിവയ്ക്കാറുണ്ട്! പഠിക്കേണ്ട കാര്യങ്ങൾ, പൂർത്തിയാക്കേണ്ട ജോലികൾ, പറയേണ്ട സ്നേഹവാക്കുകൾ, ചെയ്യേണ്ട നല്ല കാര്യങ്ങൾ… എല്ലാം നാളത്തേക്ക് മാറ്റിവയ്ക്കുമ്പോൾ അറിയാതെ തന്നെ വിലപ്പെട്ട സമയം കടന്നുപോകുന്നു.
നല്ല കാര്യങ്ങൾ തുടങ്ങാൻ പ്രത്യേക ദിവസത്തിനോ അനുയോജ്യമായ സാഹചര്യത്തിനോ വേണ്ടി കാത്തിരിക്കേണ്ടതില്ല. ചെറിയൊരു ചുവടുവയ്പ്പിലൂടെ ഇന്ന് തന്നെ തുടങ്ങാം. ദിവസത്തെ ജോലികൾ മുൻകൂട്ടി ക്രമീകരിക്കുന്നതും പ്രധാനപ്പെട്ട കാര്യങ്ങൾക്ക് മുൻഗണന നൽകുന്നതും സമയത്തെ ഫലപ്രദമായി വിനിയോഗിക്കാൻ സഹായിക്കും. മൊബൈൽ ഫോണിലും സോഷ്യൽ മീഡിയയിലും അനാവശ്യമായി ചെലവഴിക്കുന്ന സമയം കുറച്ചാൽ തന്നെ ജീവിതത്തിൽ പല നല്ല മാറ്റങ്ങളും കൊണ്ടുവരാനാകും.
സ്നേഹത്തിനും സന്തോഷത്തിനും സമയം കണ്ടെത്താം
തിരക്കുപിടിച്ച ജീവിതത്തിനിടയിൽ പലപ്പോഴും നാം മറന്നുപോകുന്ന ഒന്നുണ്ട്: നമ്മുടെ പ്രിയപ്പെട്ടവർക്കായി സമയം കണ്ടെത്തുക എന്നത്. കുടുംബത്തോടൊപ്പം അൽപ്പനേരം സംസാരിക്കുക, മാതാപിതാക്കളുടെ വിശേഷങ്ങൾ ചോദിക്കുക, മക്കളുടെ കൊച്ചുകൊച്ചു സന്തോഷങ്ങൾ കേൾക്കുക, സുഹൃത്തുക്കളെ ചേർത്തുപിടിക്കുക… ഇത്തരം നിമിഷങ്ങളാണ് ജീവിതത്തിന് യഥാർഥ സൗന്ദര്യം നൽകുന്നത്.
പണംകൊണ്ട് പലതും നേടാനാകും. എന്നാൽ സ്നേഹത്തോടെ ഒരാൾക്കൊപ്പം ചെലവഴിച്ച സമയം പണംകൊണ്ട് വാങ്ങാനാവില്ല. അതുപോലെതന്നെ നമ്മുടെ ആരോഗ്യത്തിനും വിശ്രമത്തിനും പ്രാർഥനയ്ക്കും ഇഷ്ടപ്പെട്ട കാര്യങ്ങൾക്കുമെല്ലാം സമയം മാറ്റിവയ്ക്കണം. ജീവിതം ഉത്തരവാദിത്തങ്ങൾ നിറവേറ്റാൻ മാത്രമുള്ളതല്ല; സന്തോഷിക്കാനും സ്നേഹിക്കാനും നല്ല ഓർമകൾ സൃഷ്ടിക്കാനുമുള്ളതാണ്.
ഓരോ നിമിഷവും ഒരു പുതിയ അവസരം
സമയം ആരെയും കാത്തുനിൽക്കുന്നില്ല. ഇന്നത്തെ ദിവസം ഒരിക്കൽ മാത്രമേ നമുക്ക് ലഭിക്കൂ. അതിനാൽ ഓരോ ദിവസവും ഒരു പുതിയ അവസരമായി കാണാം. വലിയ നേട്ടങ്ങൾക്കായി മാത്രം കാത്തിരിക്കാതെ ചെറിയ സന്തോഷങ്ങൾ ആസ്വദിക്കാം. ഒരാൾക്ക് ആശ്വാസം നൽകുന്ന വാക്ക് പറയാനും വിഷമിക്കുന്നവരെ ചേർത്തുപിടിക്കാനും കഴിയുന്ന നിമിഷങ്ങൾ പാഴാക്കാതിരിക്കാം.
ജീവിതം എത്രകാലം നീണ്ടുനിന്നു എന്നതിലുപരി, ലഭിച്ച സമയം എത്രത്തോളം മനോഹരമായി ജീവിച്ചു എന്നതിനാണ് പ്രാധാന്യം. കടന്നുപോയ നിമിഷങ്ങൾ ഓർമകളായി മാറുമ്പോൾ ഇന്നത്തെ ഓരോ നിമിഷവും നാളെയുടെ നല്ല ഓർമകൾ സൃഷ്ടിക്കാനുള്ള അവസരമാണ്. അതുകൊണ്ട് സമയം വെറുതെ കടന്നുപോകാൻ അനുവദിക്കരുത്. ഓരോ നിമിഷത്തിലും നന്മയും സന്തോഷവും സ്നേഹവും നിറയ്ക്കാം. കാരണം, ജീവിതം നമുക്ക് നൽകുന്ന ഏറ്റവും വിലയേറിയ സമ്മാനം സമയമാണ്; അതിനെ മനോഹരമായ ഓർമകളാക്കി മാറ്റേണ്ടത് നമ്മുടെ ഉത്തരവാദിത്തവുമാണ്.
വിവർത്തനം: ഡിൻസി തോമസ്
