“ഭൂമിയില്‍ തീയിടാനാണ്‌ ഞാന്‍ വന്നത്‌. അത്‌ ഇതിനകം കത്തിജ്വലിച്ചിരുന്നെങ്കില്‍!”(ലൂക്കാ 12:49).
അഗ്നിയെ വിശുദ്ധ ഗ്രന്ഥത്തിൽ പഴയനിയമത്തിൽ നശീകരണ-ശക്തിയായും (Destructive Force) പുതിയ നിയമത്തിൽ ശുദ്ധീകരണ-ശക്തിയായും (Purifying Force) അവതരിപ്പിക്കുന്നു. ഉദാഹരണത്തിന്, പാപം നിറഞ്ഞ സോദോം-ഗൊമോറ നഗരങ്ങളെ തീയും ഗന്ധകവും അയച്ച് ദൈവം നശിപ്പിക്കുന്നു (ഉൽപ. 19:24), മരുഭൂമി യാത്രയിൽ തനിക്കെതിരെ തിരിഞ്ഞവർക്കെതിരെ ദഹിപ്പിക്കാനായി ദൈവം അയച്ച പത്ത് മഹാമാരികളിൽ ഏഴാമത്തേത് തീ ആയിരുന്നു (പുറ. 9: 13-35). അതുപോലെ വിജാതീയ വിഗ്രഹമായ ബാലിന്റെ പുരോഹിതർക്കെതിരെയുള്ള ദൈവശക്തി പരീക്ഷണത്തിൽ ബലിവസ്തുക്കൾ ദഹിപ്പിക്കാനായി ഏലിയാ പ്രവാചകൻ സ്വർഗത്തിൽ നിന്നും അഗ്നി വിളിച്ചിറക്കുന്നു (1 രാജ. 18:25).
എന്നാൽ, പുതിയ നിയമത്തിൽ തീ സകലത്തെയും നവീകരിക്കുന്ന പരിശുദ്ധാത്മാവിന്റെ പ്രതീകമാണ്. പെന്തക്കുസ്താ തിരുനാളിൽ പരിശുദ്ധാത്മാവ് തീനാവുകളുടെ രൂപത്തിലാണ് ശിഷ്യരുടെമേല്‍ എഴുന്നള്ളിവന്നത് (അപ്പ. 2:3). സ്നാപകയോഹന്നാൻ സൂചിപ്പിക്കുന്ന ജലത്താലും അഗ്നിയാലുമുള്ള മാമോദീസ പരിശുദ്ധാത്മാവിന്റെ സ്വീകരണത്തിലേക്കാണ് വിരൽചൂണ്ടുന്നത് (മത്തായി 3:11).
യേശു ഭൂമിയിൽ ഇട്ട തീ പരിശുദ്ധാത്മാവാണ്. ആ തീയാലാണ് അവിടുന്ന് ലോകത്തെ വിശുദ്ധീകരിച്ചതും തിരുസഭ ഇന്ന് കൂദാശകളിലൂടെ സഭാമക്കളെ വിശുദ്ധീകരിക്കുന്നതും. ആമേൻ.
ഫാ. ജെറി വള്ളോംകുന്നേൽ MCBS
