ഈശോയോടൊപ്പം സുപ്രഭാതം
സ്നേഹനിധിയായ പിതാവേ, വിശുദ്ധ ആഴ്ചയിലെ ഈ പ്രഭാതത്തിൽ എന്റെ കൂടെ വസിക്കുന്ന അങ്ങയുടെ മഹനീയ സ്നേഹത്തെ ഞങ്ങൾ വാഴ്ത്തുന്നു, സ്തുതിക്കുന്നു. ഇന്നേ ദിനം എന്റെ ഉള്ളിലുള്ള നിന്റെ സ്വരം ശ്രവിക്കാനും സ്നേഹത്തിന്റെയും നീതിയുടെയും സത്യത്തിന്റെയും വഴികളിലൂടെ സഞ്ചരിക്കുവാനും എന്നെ സഹായിക്കണമേ . ഈ ദിവസത്തെ എന്റെ സന്തോഷങ്ങളും സങ്കടങ്ങളും സഹനങ്ങളും പരിശുദ്ധ മാർപാപ്പയുടെ ഈ മാസത്തെ നിയോഗമായ ആദ്ധ്യാത്മിക വിവേചനാശക്തിയിലുള്ള പരിശീലനം ‘ വ്യക്തിപരമായും സമൂഹപരമായും തലങ്ങളിൽ നേടുന്നതിനു ഞാൻ കാഴ്ചവയ്ക്കുന്നു. ആമ്മേൻ
സ്വർഗ്ഗസ്ഥനായ പിതാവേ….
ഈശോയോടൊപ്പം മദ്ധ്യാഹ്നം
പരിശുദ്ധാത്മ കൃപയാൽ നവീകരിക്കപ്പെട്ട ഹൃദയത്തോടെ ഈസ്റ്റർ ആഘോഷിക്കാൻ രക്ഷകനായ ക്രിസ്തുവിനോടുകൂടെ ഈ വിശുദ്ധ ആഴ്ചയിലേക്കു നമുക്കു പ്രവേശിക്കാം. (ഫ്രാൻസീസ് പാപ്പ ) ഈശോയെ നവീകരിക്കപ്പെട്ട ഹൃദയത്തോടെ വിശുദ്ധ ആഴ്ചയിൽ ജിവിക്കാൻ എനിക്കു കൃപ നൽകണമേ.
ഈശോയോടൊപ്പം രാത്രി
“കര്‍ത്താവേ, ഞാനങ്ങയെവിളിച്ചപേക്‌ഷിക്കുന്നു; എന്‍െറ അഭയശിലയായ അങ്ങ്‌എനിക്കുനേരേ ചെവിയടയ്‌ക്കരുതേ! അങ്ങു മൗനം പാലിച്ചാല്‍ ഞാന്‍ പാതാളത്തില്‍ പതിക്കുന്നവനെപ്പോലെയാകും.” (സങ്കീര്‍ത്തനങ്ങള്‍ 28:1). ദൈവമേ വിശുദ്ധ ആഴ്ചയിലെ ഒരു ദിനം കൂടി പടിയിറങ്ങുമ്പോൾ, ഞാൻ നിന്റെ സാന്നിധ്യത്തിൽ വിശ്രമിക്കട്ടെ . ഇന്നേദിനം ഞാൻ കണ്ടുമുട്ടിയവരെ സ്നേഹിക്കുവാനും ശുശ്രൂഷിക്കാനും സാധിച്ചതിനു ഞാൻ നന്ദി പറയുന്നു. മറ്റുള്ളവരെ ഇന്നേദിനം ബോധപൂർവ്വം അവഗണിച്ചെങ്കിൽ എന്നോട് ക്ഷമിക്കണമേ. നാളെ നിന്റെ രാജ്യത്തിനുവേണ്ടി ശ്രദ്ധയോടെ അധ്വാനിക്കാൻ എന്നെ സഹായിക്കേണമേ. ആമ്മേൻ
നന്മ നിറഞ്ഞ മറിയമേ ….
