വിശുദ്ധ കുര്‍ബാന സ്വീകരിച്ചതിനുശേഷം പ്രാര്‍ത്ഥിക്കുവാനായി വി. പാദ്രെ പിയോ പഠിപ്പിക്കുന്ന പ്രാര്‍ത്ഥന

വിശുദ്ധ കുര്‍ബാന സ്വീകരിച്ചതിനു ശേഷമുള്ള നിമിഷങ്ങള്‍ ഏറ്റവും വിശുദ്ധവും മനോഹരവുമായ സമയമാണ്. ഈശോ ഒരു അപ്പമായി നമ്മുടെ ഉള്ളിലെത്തുന്ന, നമ്മില്‍ അലിഞ്ഞുചേരുന്ന നിമിഷം. ഈ നിമിഷം ദൈവവുമായുള്ള സംഭാഷണത്തിന് ഏറ്റവും യോജിച്ച സമയമാണ്. നമ്മുടെ ആവശ്യങ്ങളും നമുക്ക് ആവശ്യമായ അനുഗ്രഹങ്ങളും ഈശോ നമുക്ക് തരുന്ന സമയമാണ് ഇത്.

വിശുദ്ധ കുര്‍ബാന സ്വീകരിച്ചതിനു ശേഷമുള്ള ഈ സമയം പ്രാര്‍ത്ഥിക്കുന്നതിനായി വി. പാദ്രെ പിയോ പഠിക്കുന്ന മനോഹരമായ ഒരു ചെറിയ പ്രാര്‍ത്ഥനയുണ്ട്. ആ പ്രാര്‍ത്ഥന ചുവടെ ചേര്‍ക്കുന്നു:

“ദൈവമേ, എന്റെ ഒപ്പം വസിക്കണമേ. ഞാന്‍ ദുര്‍ബലനാണ്. വീഴാതിരിക്കാനായി എനിക്ക് അങ്ങയുടെ ശക്തി ആവശ്യമാണ്”

“ദൈവമേ, എന്റെ ഉള്ളില്‍ വസിക്കണമേ. കാരണം അങ്ങാണ് എന്റെ ജീവന്‍. അങ്ങയെ കൂടാതെയുള്ള ജീവിതം പ്രത്യാശാരഹിതവും അര്‍ത്ഥമില്ലാത്തതുമാണ്.”

“ദൈവമേ, എന്റെ ഉള്ളില്‍ വസിക്കണമേ. കാരണം അങ്ങാണ് എന്റെ പ്രകാശം. അങ്ങ് എന്റെ ഒപ്പം ഇല്ലെങ്കില്‍ ഞാന്‍ ഇരുട്ടിലായിരിക്കും.”

“ദൈവമേ, എന്റെ ഉള്ളില്‍ വസിക്കണമേ. അങ്ങയുടെ ഇഷ്ടം എന്താണെന്ന് എനിക്ക് കാണിച്ചുതരണമേ.”

“ദൈവമേ, എന്റെ ഉള്ളില്‍ വസിക്കണമേ. അങ്ങനെ എനിക്ക് അങ്ങയുടെ സ്വരം ശ്രവിക്കുവാനും അതിലൂടെ അങ്ങയെ അനുഗമിക്കാനും ഇടയാകട്ടെ.”

“ദൈവമേ, എന്റെ ഉള്ളില്‍ വസിക്കണമേ. അങ്ങയെ കൂടുതല്‍ സ്‌നേഹിക്കുവാനും അങ്ങയോടുള്ള സൗഹൃദത്തില്‍ ആയിരിക്കുവാനും ഞാന്‍ ആഗ്രഹിക്കുന്നു.”

“ദൈവമേ, അങ്ങയോടുള്ള വിശ്വസ്തതയില്‍ ഞാന്‍ എന്നും നിലനില്‍ക്കുന്നതിനായി അങ്ങ് എന്റെ ഉള്ളില്‍ വസിക്കണമേ.”

“ദൈവമേ, എന്റെ ഉള്ളില്‍ വസിക്കണമേ. എന്റെ ആത്മാവിനെ അങ്ങേയ്ക്കിഷ്ടമുള്ള വാസസ്ഥലമാക്കുവാനും അങ്ങയുടെ സ്‌നേഹത്തില്‍ ജ്വലിക്കുവാനും ഞാന്‍ ആഗ്രഹിക്കുന്നു.”

“ദൈവമേ, എന്റെ ഉള്ളില്‍ വസിക്കണമേ. കാരണം ദിവസങ്ങള്‍ അടുത്തിരിക്കുന്നു. എന്റെ ജീവന്‍ കടന്നുപോകാറായിരിക്കുന്നു. മരണം, ന്യായവിധി, നിത്യത എന്നിവ അടുത്തുവരുകയാണ്. അതിനാല്‍ എന്നെ ശക്തിപ്പെടുത്തണമേ. അങ്ങനെ ഞാന്‍ അങ്ങയുടെ വഴിയിലേയ്ക്കു വേഗം എത്തട്ടെ. ഇപ്പോള്‍ തന്നെ സമയം വളരെ വൈകിയിരിക്കുന്നു.”

“ദൈവമേ, എന്നോടൊത്ത് നില്‍ക്കണമേ. എന്റെ മരണസമയത്ത് ഞാന്‍ അങ്ങയോടു കൂടെ അങ്ങയുടെ കൃപയിലും സ്‌നേഹത്തിലും ആയിരിക്കുവാന്‍ ആഗ്രഹിക്കുന്നു.”

“ദൈവമേ, എന്നോടൊത്ത് ആയിരിക്കണമേ. സ്വര്‍ഗീയമായ സമാശ്വാസം ഞാന്‍ ആവശ്യപ്പെടുന്നില്ല. കാരണം അതിനു ഞാന്‍ യോഗ്യനല്ല. എങ്കിലും അങ്ങയുടെ സാന്നിധ്യം എന്റെ കൂടെ ഉണ്ടായിരിക്കണമേ. അങ്ങയോടു ഞാന്‍ യാചിക്കുകയാണ്.”

“ദൈവമേ, അങ്ങയെ ഞാന്‍ തേടുകയാണ്. അങ്ങയെ കൂടുതല്‍ കൂടുതല്‍ സ്‌നേഹിക്കുവാനുള്ള കൃപാവരം മാത്രം എനിക്ക് നല്‍കണമേ. ഭൂമിയില്‍ ഉള്ളിടത്തോളം കാലം അങ്ങയെ പൂര്‍ണ്ണഹൃദയത്തോടെ സ്‌നേഹിക്കുവാന്‍ എന്നെ അനുഗ്രഹിക്കണമേ. അങ്ങനെ നിത്യതയിലും അങ്ങയുമായുള്ള സ്‌നേഹത്തില്‍ തുടരാന്‍ കഴിയുമല്ലോ. ആമ്മേന്‍.”

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

അഭിപ്രായങ്ങൾ

1 COMMENT

  1. നിർമലമായ ഹൃദയത്തോടെ വിശുദ്ധ കുർബാന സ്വീകരിച്ചതിനു ശേഷം ഉള്ള പ്രാർത്ഥനകൾക്ക് ശക്തിയുണ്ട് , പുൽക്കൂട്ടിൽ പിറന്ന ഉണ്ണിയേശുവിൻ്റെ ആനന്ദം നമ്മുടെ ഉള്ളറയിൽ ഉണ്ടാകുന്നു

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.