യുദ്ധത്തിന്റെ ഭീകരതകൾക്കിടയിലും, ജൂലിയൻ കലണ്ടർ അനുസരിക്കുന്ന ഉക്രൈനിലെ സഭകൾ ഈസ്റ്റർ ആഘോഷിച്ചു. റഷ്യയ്‌ക്കെതിരായാ യുദ്ധം മൂന്നാം വർഷത്തിലേക്കു കടക്കുമ്പോൾ നാശത്തിന്റെയും മരണത്തിന്റെയും നടുവിൽ സുവിശേഷത്തിൽ വിശ്വാസമർപ്പിച്ച് കീവിലെ ഓർത്തഡോക്സ് വിശ്വാസികൾ വിശുദ്ധ വ്ലാഡിമർ കത്തീഡ്രലിൽ ഒരുമിച്ചുകൂടി.
ഈ ദിവസങ്ങളിൽ യുദ്ധത്തിലായിരിക്കുമെന്നതിനാൽ ചിലയിടങ്ങളിൽ ഉക്രൈൻ സൈനികർ ഉയിർപ്പുതിരുനാളിനു മുൻപേതന്നെ ആശീർവാദം സ്വീകരിച്ചു. കീവിലെ കത്തീഡ്രൽ ദൈവാലയത്തിൽ വിശ്വാസികൾ ഒരുമിച്ചുകൂടി സമാധാനത്തിനുവേണ്ടി പ്രാർഥിച്ചു. ദൈവം തങ്ങളോടു കൂടെയുണ്ട്. ഒരുതരത്തിൽ യേശുക്രിസ്തു ഇന്ന് ഉക്രൈന്റെ ക്രൂശിക്കപ്പെട്ട ശരീരമാണ്. അവൻ ഈ എളിയജനങ്ങളുടെ മുറിവുകളോടൊപ്പമുണ്ട് എന്ന് ആർച്ചുബിഷപ്പ് സ്വിയാതൊസ്ലാവ് ഷെവ്ചുക് സന്ദേശത്തിൽ പറഞ്ഞു.
ആശുപത്രികൾ സന്ദർശിക്കാറുള്ള അദ്ദേഹം, അവിടെക്കണ്ട അംഗവിച്ഛേദനങ്ങളെക്കുറിച്ചും സംസാരിച്ചു. ഏകദേശം 1500-ഓളം പേരാണ് അവിടെ യുദ്ധത്തിന്റെ ഭാഗമായി ശരീരാവയവങ്ങൾ നഷ്ടപ്പെട്ടവരായുള്ളത്. “ആ മുറിവുകൾ കർത്താവേ, നിന്റെതാണ്” എന്ന് ചിന്തിക്കുന്നുവെന്നും ആർച്ചുബിഷപ്പ് കൂട്ടിച്ചേർത്തു.
റഷ്യയുടെ ഡ്രോൺ പ്രവാഹത്തിൽ ഈസ്റ്റർ ദിനത്തിൽപോലും ആളുകൾ അപകടപ്പെട്ടു. കഠിനമായ പോരാട്ടത്തിനൊടുവിൽ സൈന്യം ഓച്ചരെടിൻ ഗ്രാമത്തിന്റെ നിയന്ത്രണം പിടിച്ചെടുത്തതായാണ് റിപ്പോർട്ട്.
