ഒക്ടോബർ മാസത്തിലെ ജപമാല മാസാചരണത്തിന് മുന്നോടിയായി വാഷിംഗ്ടൺ ഡി.സി.യിലെ നാഷണൽ ഷ്രൈൻ ഓഫ് ദി ഇമ്മാക്കുലേറ്റ് കൺസെപ്ഷൻ ബസിലിക്കയിൽ ആയിരക്കണക്കിന് കത്തോലിക്കാ വിശ്വാസികൾ അണിനിരന്നു. പ്രൊവിൻസ് ഓഫ് സെന്റ് ജോസഫിലെ ഡൊമിനിക്കൻ വൈദികർ സംഘടിപ്പിച്ച നാലാമത് വാർഷിക ‘ഡൊമിനിക്കൻ ജപമാല തീർഥാടനത്തിൽ’ മൂവായിരത്തോളം ആളുകൾ നേരിട്ടും പതിനായിരക്കണക്കിന് വിശ്വാസികൾ ലൈവ് സ്ട്രീം വഴിയും പങ്കെടുത്തു.
സെപ്റ്റംബർ 26-ന് നടന്ന ദിനാചരണത്തിൽ വിശുദ്ധ കുർബാനയുടെ ആരാധന, കുമ്പസാരം, ജപമാല പ്രഘോഷണം, ബോധവൽക്കരണ പ്രസംഗങ്ങൾ എന്നിവ ഉൾപ്പെടുത്തിയിരുന്നു. ഈ വൻ തീർഥാടനത്തിന് മുന്നോടിയായി ജനുവരി 31 മുതൽ സെപ്റ്റംബർ 26 വരെ ഏകദേശം ലക്ഷത്തോളം വിശ്വാസികൾ ഒമ്പത് മാസം നീണ്ടുനിന്ന പ്രത്യേക നൊവേനയിൽ പങ്കെടുത്തതായി സംഘാടകർ അറിയിച്ചു. പ്രതിവർഷം ഈ തീർഥാടനത്തിൽ പങ്കെടുക്കുന്നവരുടെ എണ്ണം വർധിച്ചുവരികയാണെന്ന് ഡൊമിനിക്കൻ പ്രൊവിൻസ് വക്താവ് ഫാദർ പാട്രിക് ബ്രിസ്കോ പറഞ്ഞു. യു.എസിലെ പ്രമുഖ സംസ്ഥാനങ്ങളിൽ നിന്നെല്ലാം നിരവധി കുടുംബങ്ങളും യുവാക്കളും പ്രാർഥനാദിനത്തിൽ പങ്കാളികളായി.
ജപമാല വെറുമൊരു പ്രാർഥന മാത്രമല്ല, അത് ദൈവവുമായുള്ള ജീവസ്സുറ്റ ബന്ധമാണെന്ന് പരിപാടിയിലെ പ്രധാന പ്രഭാഷകനായ ഫാദർ പീറ്റർ ജോൺ കാമറൂൺ ഓർമ്മിപ്പിച്ചു. ഒക്ടോബർ മാസം മുഴുവൻ കത്തോലിക്കാ സഭ പരിശുദ്ധ ജപമാലയുടെ മാസമായി ആചരിക്കുകയും ഒക്ടോബർ 7-ന് ജപമാല രാജ്ഞിയുടെ തിരുനാൾ ആഘോഷിക്കുകയും ചെയ്യുന്ന പശ്ചാത്തലത്തിലാണ് ഈ തീർഥാടനം സംഘടിപ്പിച്ചത്.
