വിവാഹത്തിന് തൊട്ടുമുമ്പ് പിതാവ് അസുഖബാധിതനായി ആശുപത്രിയിലായതിനെത്തുടർന്ന് വിവാഹവസ്ത്രത്തിൽ ആശുപത്രി വാർഡിലെത്തി പിതാവിനൊപ്പം നൃത്തം ചെയ്ത് വധു. യുകെയിലെ മാഞ്ചസ്റ്ററിലാണ് മനസ്സ് നിറയ്ക്കുന്ന ഈ സംഭവം നടന്നത്.
യുകെയിലെ ഡക്കിൻഫീൽഡ് സ്വദേശിനിയായ 36 കാരി സിനീഡ് ജാക്‌സണാണ് തന്റെ 19 വർഷത്തെ പങ്കാളിയായ സ്റ്റീഫനുമായുള്ള വിവാഹദിനത്തിൽ പിതാവ് ലെസ്ലി ഹീലിയെ കാണാൻ ടെയിംസൈഡ് ജനറൽ ആശുപത്രിയിലെത്തിയത്. ഒക്ടോബർ പത്തിന് മാഞ്ചസ്റ്ററിലെ ഹൈഡിലുള്ള വില്ലേജ് ഹോട്ടലിൽ വച്ചായിരുന്നു വിവാഹം നിശ്ചയിച്ചിരുന്നത്. എന്നാൽ വിവാഹത്തിന് രണ്ടു ദിവസം മുമ്പ് ലെസ്ലിയെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിക്കുകയായിരുന്നു.
കുട്ടിക്കാലം മുതലേ അച്ഛന്റെ കൈപിടിച്ച് വിവാഹവേദിയിലേക്ക് നടക്കണമെന്നതായിരുന്നു തന്റെ ഏറ്റവും വലിയ ആഗ്രഹമെന്നും അച്ഛന് വരാൻ കഴിയില്ലെന്നറിഞ്ഞപ്പോൾ ആകെ തകർന്നുപോയെന്നും സിനീഡ് പറഞ്ഞു. ആരോഗ്യസ്ഥിതി മോശമായതിനാൽ ഒരു മണിക്കൂർ പോലും അച്ഛനെ പുറത്തുവിടാൻ കഴിയില്ലെന്ന് ഡോക്ടർമാർ വ്യക്തമാക്കിയതോടെയാണ് വിവാഹച്ചടങ്ങിന് തൊട്ടുമുമ്പ് സിനീഡ് ആശുപത്രി വാർഡിലേക്ക് നേരിട്ടെത്താൻ തീരുമാനിച്ചത്.
വിവാഹവസ്ത്രമണിഞ്ഞ് ആശുപത്രിയിലെത്തിയ സിനീഡിനെ കണ്ട് അച്ഛനും അവിടെയുണ്ടായിരുന്ന നഴ്സുമാരും രോഗികളും വിതുമ്പി. തുടർന്ന് ആശുപത്രി അധികൃതരുടെ അനുമതിയോടെ വിവാഹസ്യൂട്ട് ധരിച്ച അച്ഛനൊപ്പം സിനീഡ് വാർഡിൽ വച്ച് പരമ്പരാഗത നൃത്തം ചെയ്തു.
തുടർന്ന് അച്ഛന്റെ നിർദേശപ്രകാരം അഞ്ചുവയസ്സുകാരനായ മകൻ മാക്സിയാണ് സിനീഡിനെ വിവാഹവേദിയിലേക്ക് ആനയിച്ചത്. നിലവിൽ ചികിത്സയ്ക്ക് ശേഷം ലെസ്ലി സുഖം പ്രാപിച്ച് വീട്ടിൽ തിരിച്ചെത്തിയിട്ടുണ്ട്. രോഗക്കിടക്കയിലും മകളുടെ സ്നേഹവും ആശുപത്രി ജീവനക്കാരുടെ പിന്തുണയും തങ്ങൾക്ക് മറക്കാനാവാത്ത ഓർമ്മ സമ്മാനിച്ചതായി കുടുംബം പറഞ്ഞു.
