ക്രിസ്തുരാജന്റെ തിരുനാളായ നവംബർ 26 -ന് ആരംഭിക്കുന്ന 2023-2024 അജപാലനവർഷം ഇസ്ലാമാബാദ് – റാവൽപിണ്ടി അതിരൂപതയിൽ ‘അത്മായവർഷം’ ആയി ആചരിക്കും. എല്ലാ ഇടവകകൾക്കും പ്രാദേശികസഭകൾക്കുമയച്ച കത്തിലാണ് ഇസ്ലാമാബാദ് – റാവൽപിണ്ടി അതിരൂപത മെത്രാൻ ജോസഫ് അർഷാദ് ഇപ്രകാരം അറിയിച്ചത്.
കൂടുതൽ നീതിയുക്തവും ഒത്തൊരുമയുള്ളതുമായ ഒരു രാഷ്ട്രം കെട്ടിപ്പടുക്കുന്നതിന് കുടുംബത്തിലും ജോലിസ്ഥലത്തും പാക്കിസ്ഥാൻ സമൂഹത്തിലും സ്വത്വം, വിളി, ദൗത്യം, സാക്ഷ്യം എന്നിവ പ്രോത്സാഹിപ്പിക്കുകയാണ് ഈ അജപാലനവർഷാചരണത്തിലൂടെ ലക്ഷ്യമിടുന്നത്. സഭയുടെ സിനഡൽ പ്രക്രിയയുടെ ഫലങ്ങളാൽ സമ്പന്നമായ വിശ്വാസത്തിന്റെ ആധികാരിക അനുഭവത്തിൽ പങ്കെടുക്കാൻ മാമ്മോദീസ സ്വീകരിച്ച എല്ലാവരെയും പ്രോത്സാഹിപ്പിച്ചുകൊണ്ട് ഈ ആരാധനാവർഷത്തിൽ ഓരോ ഇടവകയും, സന്യാസസ്ഥാപനങ്ങളും, സഭാസ്ഥാപനങ്ങളും, ആരാധനാക്രമ ആഘോഷങ്ങൾ, സമ്മേളനങ്ങൾ, ജീവകാരുണ്യസംരംഭങ്ങൾ എന്നിവ ക്രിയാത്മകമായി സംഘടിപ്പിക്കണമെന്ന് അദ്ദേഹം നിർദേശിച്ചു.
സാമൂഹികസമാധാനത്തിന് സംഭാവനനൽകാൻ കഴിയുന്ന ഒരു ഉപകരണമെന്ന നിലയിൽ ഈ വർഷം സംവാദത്തിലും എല്ലാവരുടെയും, പ്രത്യേകിച്ച് ഏറ്റവും അത്യാവശ്യക്കാരായ ദരിദ്രരുടെ സേവനത്തിലും സഭയുടെ സുവിശേഷദൗത്യത്തിൽ അത്മായർക്കുള്ള സഹ-ഉത്തരവാദിത്വത്തിലും ശ്രദ്ധകേന്ദ്രീകരിക്കും.
പാക്കിസ്ഥാനിൽ വളരെ ചെറിയ ഒരു സമൂഹം മാത്രമേ കത്തോലിക്കാ വിശ്വാസികളുള്ളൂ. മൊത്തം ജനസംഖ്യയുടെ 1.5% മാത്രമാണെങ്കിലും വിശ്വാസത്തിന്റെ വലിയ ഊർജ്ജസ്വലതയിലും ഗണ്യമായ അത്മായസാന്നിധ്യത്തിലും ജീവിതസാക്ഷ്യത്തിലും അവർ മുന്നിൽനിൽക്കുന്നു. മതപരമായ ആചാരങ്ങളെ സംബന്ധിച്ചിടത്തോളം, ഞായറാഴ്ചശുശ്രൂഷകളിൽ പതിവായി പങ്കെടുക്കുകയും കൂദാശകൾ സ്വീകരിക്കുകയും ആഘോഷിക്കുകയും ചെയ്യുന്ന വിശ്വാസികളുടെ ശതമാനം പ്രാദേശിക കത്തോലിക്കാ ജനസംഖ്യയുടെ ഏകദേശം 70% ആണ്.
ഇസ്ലാമാബാദ് – റാവൽപിണ്ടി അതിരൂപത സാമൂഹിക, വിദ്യാഭ്യാസ, ആരോഗ്യമേഖലകളിൽ വളരെയധികം പ്രവർത്തനങ്ങൾ നടത്തുന്നു. സ്കൂളുകളും സ്ഥാപനങ്ങളും ആശുപത്രികളും മറ്റ് ആരോഗ്യസൗകര്യങ്ങളും എല്ലാ മതവിശ്വാസികൾക്കുമായി തുറന്നിരിക്കുന്നതാണ്. കൂടാതെ, കുട്ടികൾക്കായുള്ള പദ്ധതികൾ, കാർഷിക സഹായപരിപാടികൾ, അടിയന്തിര സാഹചര്യങ്ങളിലും പ്രകൃതിദുരന്തങ്ങളിലും നടത്തുന്ന സേവനപ്രവർത്തനങ്ങളിലും അത്മായരുടെ പങ്കാളിത്തം വളരെ നിർണ്ണായകമാണ്.
43 ദശലക്ഷം നിവാസികളുള്ള ഇസ്ലാമാബാദ് – റാവൽപിണ്ടി അതിരൂപതയിൽ 24 ഇടവകകളിലായി ഏകദേശം 2,20,000 വിശ്വാസികളുണ്ട്.
