ആർട്ടിഫിഷ്യൽ ഇന്റലിജൻസ് (AI) ഇന്ന് നമ്മുടെ ജീവിതത്തിന്റെ ഭാഗമായി മാറിക്കഴിഞ്ഞ സാഹചര്യത്തിൽ, കത്തോലിക്കാ വിശ്വാസത്തെ അടിസ്ഥാനമാക്കി പ്രവർത്തിക്കുന്ന എഐ പ്ലാറ്റ്ഫോമുകൾ നിലവിലുണ്ടെന്ന കാര്യം അറിഞ്ഞിരിക്കേണ്ടത് അത്യാവശ്യമാണ്. എങ്കിലും, ആർട്ടിഫിഷ്യൽ ഇന്റലിജൻസിനെ മനുഷ്യൻ അമിതമായി ആശ്രയിക്കുന്നത് ആശങ്കാജനകമാണ്.
എഐയുടെ ഉപയോഗം മനുഷ്യനെ വിഷാദത്തിലേക്കും ഉത്കണ്ഠയിലേക്കും നയിക്കുന്നു. അതേസമയം, കൂടുതൽ ആളുകൾ എഐ ഉപയോഗിക്കുന്നു എന്നത് ഒരു യാഥാർഥ്യമാണ്. പലരും ഇതിനെ സമയം ലാഭിക്കാനുള്ള ഒരു മാർഗമായി കാണുന്നു, ചിലർക്ക് ജോലിസ്ഥലങ്ങളിൽ ഇത് ഉപയോഗിക്കേണ്ടതായും വരുന്നു. എഐയെക്കുറിച്ച് ഗുരുതരമായ ആശങ്കകളുള്ളവർ പോലും ചില പ്രത്യേക ആവശ്യങ്ങൾക്കായി ഇതൊരു സഹായകരമായ ഉപകരണമായി കാണുന്നുണ്ട്.
ധാരാളം ആളുകൾ ഇത് ഉപയോഗിക്കുന്ന സാഹചര്യത്തിൽ, കത്തോലിക്കാ ലോകവീക്ഷണത്തിൽ അധിഷ്ഠിതമായ എഐ പ്ലാറ്റ്ഫോമുകളെ പരിചയപ്പെടുത്തുന്നത് നന്നായിരിക്കും. എന്നാൽ, ചില പ്രധാന കാര്യങ്ങൾ മനസ്സിൽ സൂക്ഷിക്കേണ്ടതുണ്ട്.
എഐ-യെ ഒരിക്കലും പൂർണ്ണമായി വിശ്വസിക്കരുത്
എഐ ഉപയോഗിക്കുമ്പോൾ ഈ രണ്ട് കാര്യങ്ങൾ എപ്പോഴും ഓർക്കുക: എഐക്ക് പലപ്പോഴും പിഴവുകൾ സംഭവിക്കാറുണ്ട്: ബിബിസി (BBC) നടത്തിയ ഒരു പഠനമനുസരിച്ച്, എഐ സംവിധാനങ്ങൾ പകുതിയോളം തവണയും വാർത്തകളെ തെറ്റായ രീതിയിലാണ് അവതരിപ്പിക്കുന്നത്.
എഐ ഒരു ‘സൈക്കോഫാന്റിക്’ ആണ്: സത്യം പറയുന്നതിനേക്കാൾ, നിങ്ങൾ കേൾക്കാൻ ആഗ്രഹിക്കുന്നത് എന്താണോ അത് പറയാനാണ് എഐ ശ്രമിക്കുന്നത്. ഉപദേശങ്ങൾ നൽകുമ്പോൾ ഈ ചാറ്റ്ബോട്ടുകൾ അമിതമായി യോജിക്കുകയും, ദോഷകരമോ നിയമവിരുദ്ധമോ ആയ പെരുമാറ്റങ്ങളെപ്പോലും ശരിവെക്കുകയും ചെയ്തേക്കാം.
അതുകൊണ്ട്, സഭയുടെ സിദ്ധാന്തങ്ങൾ, ധാർമ്മികത അല്ലെങ്കിൽ അടിസ്ഥാനപരമായ വസ്തുതകൾ എന്നിവയിലൊന്നും എഐ-യെ പൂർണ്ണമായി വിശ്വസിക്കരുത്. അത് നൽകുന്ന വിവരങ്ങൾ മറ്റ് വിശ്വസനീയമായ സ്രോതസ്സുകളുമായി ഒത്തുനോക്കി ഉറപ്പുവരുത്തേണ്ടതുണ്ട്. (കത്തോലിക്കാ എഐ പ്ലാറ്റ്ഫോമുകൾ ഔദ്യോഗിക സഭാ രേഖകളെ അടിസ്ഥാനമാക്കിയാണ് വിവരങ്ങൾ നൽകുന്നത്, അതിനാൽ നിങ്ങൾക്ക് അവ എളുപ്പത്തിൽ പരിശോധിക്കാനാകും.)
ഈ മുൻകരുതലുകളോടെ, കത്തോലിക്കാ പാരമ്പര്യത്തിൽ അധിഷ്ഠിതമായി പരിശീലിപ്പിച്ചെടുത്ത മൂന്ന് എഐ പ്ലാറ്റ്ഫോമുകൾ താഴെ നൽകുന്നു.
കത്തോലിക്കാ എഐ പ്ലാറ്റ്ഫോമുകൾ
1. മജിസ്റ്റീരിയം എഐ (Magisterium AI)
കത്തോലിക്കാ സഭയ്ക്കായുള്ള ‘ലോകത്തിലെ ഒന്നാം നമ്പർ ആൻസർ എഞ്ചിൻ’ എന്ന് സ്വയം വിശേഷിപ്പിക്കുന്ന ഈ പ്ലാറ്റ്ഫോം, മാർപാപ്പമാരുടെ ചാക്രികലേഖനങ്ങൾ, കാനൻ നിയമങ്ങൾ, സഭാപിതാക്കന്മാരുടെ എഴുത്തുകൾ എന്നിവയുൾപ്പെടെ 29,000-ത്തിലധികം കത്തോലിക്കാ ഗ്രന്ഥങ്ങളുടെ വലിയൊരു ശേഖരത്തിൽ നിന്നാണ് വിവരങ്ങൾ ശേഖരിക്കുന്നത്. സഭയുടെ ഔദ്യോഗിക പഠനങ്ങളോട് കൃത്യമായി പൊരുത്തപ്പെടുന്ന രീതിയിലാണ് ഇതിന്റെ ഘടന.
2. ട്രൂത്ത്ലി (Truthly)
മജിസ്റ്റീരിയം എഐ പോലെ തന്നെ, കത്തോലിക്കാ പാരമ്പര്യം, മജിസ്റ്റീരിയം (സഭയുടെ പ്രബോധനാധികാരം), വിശുദ്ധ ഗ്രന്ഥം എന്നിവയ്ക്ക് അനുസൃതമായി മറുപടികൾ നൽകാൻ രൂപകൽപ്പന ചെയ്തതാണിത്.
ഉപയോക്താക്കളെ വിശ്വാസത്തിൽ വളരാൻ സഹായിക്കുന്നതിനായി, വിശുദ്ധ കുർബാന സമയങ്ങൾ കണ്ടെത്താനുള്ള സംവിധാനം (Mass finder), പ്രത്യേക കോഴ്സുകൾ, ബൈബിൾ പഠനങ്ങൾ എന്നിവയും ട്രൂത്ത്ലി വാഗ്ദാനം ചെയ്യുന്നു.
3. അക്യൂട്ടിസ് എഐ (Acutis AI)
വിശുദ്ധ കാർലോ അക്യൂട്ടിസിന്റെ പേരിട്ടിരിക്കുന്ന ഈ പ്ലാറ്റ്ഫോം യുവാക്കൾക്കായി പ്രത്യേകം രൂപകൽപ്പന ചെയ്തതാണ്. രക്ഷിതാക്കൾക്ക് നിയന്ത്രിക്കാൻ സാധിക്കുന്ന ശക്തമായ ക്രമീകരണങ്ങളോടെയും (Parental controls) സമയപരിധികളോടെയും കൂടിയാണ് ഇത് കത്തോലിക്കാ ധാർമ്മിക ഉപദേശങ്ങൾ നൽകുന്നത്.
പീറ്റർ, തോമസ് കൂണി എന്നീ കോളേജ് വിദ്യാർഥികളായ സഹോദരന്മാർ ചേർന്നാണ് അക്യൂട്ടിസ് എഐ വികസിപ്പിച്ചെടുത്തത്. കത്തോലിക്കാ പഠനങ്ങളെക്കുറിച്ച് ഉപയോക്താക്കളെ ബോധവത്കരിക്കുന്നതിനപ്പുറം വലിയൊരു ലക്ഷ്യം ഇതിനുണ്ട്.
