“എങ്കിലും ഞാന്‍ ഏകനല്ല. കാരണം, പിതാവ് എന്റെ കൂടെയുണ്ട്” (32) എന്ന ഈശോയുടെ വാക്കുകള്‍ നമുക്കും ബലമാകേണ്ട വാക്കുകളാണ്. എല്ലാവരും ഉപേക്ഷിച്ചുപോകുന്ന കാലത്തും ദൈവം കൂടെ നില്‍ക്കും എന്നത് ഏതു മനുഷ്യനും ആശ്വാസം പകരുന്ന കാര്യമാണ്. നമ്മുടെ ജീവിതത്തിലും മറ്റുള്ളവര്‍ നമ്മെ ഉപേക്ഷിച്ചുപോയ അവസരങ്ങള്‍ ഉണ്ടായിട്ടുണ്ടല്ലോ. അപ്പോള്‍ നമ്മള്‍ നിരാശപ്പെടുകയാണോ ചെയ്തത് അതോ, ദൈവത്തില്‍ കൂടുതല്‍ ആശ്രയം വയ്ക്കുകയാണോ ചെയ്തത്? നമ്മളാരും ഏകരല്ല; ദൈവം കൂടെയുള്ളവരാണ്. അത് മനസിലാക്കുകയാണ് പ്രധാനം. “എങ്കിലും ഞാന്‍ ഏകനല്ല. കാരണം, പിതാവ് എന്റെ കൂടെയുണ്ട്” എന്ന വചനം നമുക്കും കരുത്ത് നല്‍കട്ടെ.
ജീവിതത്തിന്റെ സമാധാനം ഈശോയിൽ കണ്ടെത്താൻ നമ്മൾ പഠിക്കേണ്ടിയിരിക്കുന്നു. ലോകത്തിൽ ഞെരുക്കമുണ്ടായാലും ലോകത്തെ കീഴടക്കിയവൻ കൂടെയുണ്ടെങ്കിൽ നമ്മൾ എന്തിനു ഭയക്കണം? “നിങ്ങള്‍ എന്നില്‍ സമാധാനം കണ്ടെത്തേണ്ടതിനാണ് ഞാന്‍ ഇത് നിങ്ങളോടു പറഞ്ഞത്. ലോകത്തില്‍ നിങ്ങള്‍ക്ക് ഞെരുക്കമുണ്ടാകും; എങ്കിലും ധൈര്യമായിരിക്കുവിന്‍. ഞാന്‍ ലോകത്തെ കീഴടക്കിയിരിക്കുന്നു.” ഈ വാക്കുകൾ നമ്മുടെ ശക്തിസ്രോതസ്സായി മാറട്ടെ.
ഫാ. ജി. കടൂപ്പാറയിൽ MCBS
