1527 ൽ റോം കൊള്ളയടിക്കപ്പെട്ടപ്പോൾ അന്ന് പാപ്പയായിരുന്ന ക്ലെമെന്റ് ഏഴാമനെ ചാൾസ് അഞ്ചാമൻ രാജാവിന്റെ സേനയിൽനിന്ന് സംരക്ഷിക്കുന്നതിനിടെ കൊലചെയ്യപ്പെട്ട 147 സ്വിസ് ഭടന്മാരെ അനുസ്മരിക്കാനൊരുങ്ങി വത്തിക്കാനിലെ പൊന്തിഫിക്കൽ സ്വിസ് ഗാർഡ് സേന. ഏപ്രിൽ 21 ന് ഫ്രാൻസിസ് പാപ്പ കാലംചെയ്തതിനെ തുടർന്നും വത്തിക്കാനിൽ നടന്നുവരുന്ന കർദിനാൾമാരുടെ സമ്മേളനങ്ങളുടെയും കോൺക്ലേവിന്റെയും പശ്ചാത്തലത്തിൽ തികച്ചും സ്വകാര്യമായ ചടങ്ങുകളായിരിക്കും വത്തിക്കാനിൽ ഇതുമായി ബന്ധപ്പെട്ട് നടക്കുക.
രാവിലെ 11 മണിക്കായിരിക്കും ചടങ്ങുകളെന്ന് പൊന്തിഫിക്കൽ സ്വിസ്സ് ഗാർഡുകളുടെ ഓഫീസ് പത്രക്കുറിപ്പ് വഴി അറിയിച്ചു. പാപ്പയ്ക്കുവേണ്ടി ജീവൻ വെടിഞ്ഞ സ്വിസ് പടയാളികൾക്കായുള്ള സ്മാരകത്തിനു മുന്നിൽ പുഷ്പചക്രം സമർപ്പിച്ചുകൊണ്ടായിരിക്കും ചടങ്ങുകൾ ആരംഭിക്കുക. പൊന്തിഫിക്കൽ സ്വിസ് ഗാർഡുകളുടെ കമാൻഡർ കേണൽ ക്രിസ്റ്റോഫ് ഗ്രാഫ് പ്രഭാഷണം നടത്തും. തുടർന്ന്, പരിശുദ്ധ പിതാവിന്റെ സംരക്ഷണത്തിനുവേണ്ടി ജീവനേകിയ തങ്ങളുടെ മുൻഗാമികളുടെ ജീവത്യാഗത്തിന് സ്വിസ് ഗാർഡുകൾ ആദരാജ്ഞലി അർപ്പിക്കും.
സാധാരണയായി ഈ ദിവസത്തിൽ പാപ്പമാർ സ്വിസ് ഗാർഡുകൾക്ക് കൂടിക്കാഴ്ച അനുവദിക്കുകയും സന്ദേശം നൽകുകയും ചെയ്യാറുണ്ട്. പുതുതായി സ്വിസ് ഗാർഡുകളായി ചേരുന്നവർ സത്യപ്രതിജ്ഞ ചെയ്യുന്നതും മെയ് ആറിനാണ്.
കടപ്പാട്: വത്തിക്കാൻ ന്യൂസ്
