പ്രത്യാശ എന്നത് ദൈവത്തിൽ നിന്നും നേരിട്ട് ലഭിക്കുന്ന സമ്മാനമെന്നു ഓർമിപ്പിച്ച് ഫ്രാൻസിസ് പാപ്പ. ബുധനാഴ്ച നടന്ന പൊതുകൂടിക്കാഴ്ചയിൽ വിശ്വാസികളോട് സംസാരിക്കവെയാണ് പാപ്പ പ്രത്യാശ എന്ന പുണ്യത്തെ കുറിച്ചു പങ്കുവച്ചത്.
“ക്രിസ്ത്യാനികൾക്ക് പ്രത്യാശയുള്ളത് അവരുടെ സ്വന്തം യോഗ്യതയിലൂടെയല്ല. അവർ ഭാവിയിൽ വിശ്വസിക്കുന്നുവെങ്കിൽ അത് ക്രിസ്തു മരിക്കുകയും ഉയിർത്തെഴുന്നേൽക്കുകയും അവന്റെ ആത്മാവിനെ നമുക്ക് നൽകുകയും ചെയ്തതുകൊണ്ടാണ്. പ്രതീക്ഷ ദൈവശാസ്ത്രപരമായ ഗുണമാണെന്ന് ഞങ്ങൾ പറയുന്നു. അത് നമ്മിൽ നിന്ന് പുറപ്പെടുന്നതല്ല, നമ്മൾ സ്വയം ബോധ്യപ്പെടുത്താൻ ആഗ്രഹിക്കുന്ന ഒന്നല്ല പ്രത്യാശ. മറിച്ച് അത് ദൈവത്തിൽ നിന്ന് നേരിട്ട് ലഭിക്കുന്ന ഒരു സമ്മാനമാണ്” പാപ്പ വ്യക്തമാക്കി.
നമ്മുടെ ഹൃദയത്തിന് നൽകുന്ന ഉത്തരം ആണ് പ്രത്യാശ എന്നും അതുവഴി അസ്തിത്വപരമായ ചോദ്യങ്ങളെ അഭിമുഖീകരിക്കാൻ ക്രിസ്ത്യാനികളെ പ്രാപ്തരാക്കുന്നു എന്നും പാപ്പ കൂട്ടിച്ചേർത്തു. പ്രതീക്ഷ നഷ്‌ടപ്പെട്ടാൽ, മറ്റെല്ലാ ഗുണങ്ങളും തകർന്ന് ചാരമായി അവസാനിക്കും എന്നും പാപ്പ മുന്നറിയിപ്പ് നൽകി.
