സ്നേഹത്തിന്റെ കല്പനയെ ക്രിസ്തു ഇപ്രകാരം സംഗ്രഹിച്ചു: “ഞാൻ നിങ്ങളെ സ്നേഹിച്ചതുപോലെ നിങ്ങളും പരസ്പരം സ്നേഹിക്കുവിൻ. സ്നേഹിതനായി ജീവൻ ബലികഴിക്കുന്നതിനെക്കാൾ വലിയ സ്നേഹമില്ല.” ഈ ലോകത്തെ ദൈവം സ്നേഹിച്ചതിനപ്പുറം ആരും സ്നേഹിച്ചിട്ടില്ല. കാരണം സ്വപുത്രനെപ്പോലും ബലിയായി നല്കി ഈ ലോകത്തെ സ്നേഹിച്ചവനാണ് ദൈവം. പൗലോസ് ശ്ലീഹായുടെ വാക്കുകളിൽ “സ്നേഹം അസൂയപ്പെടുന്നില്ല, ദേഷ്യപ്പെടുന്നില്ല, സ്വാർഥമായി മറ്റൊന്നും ആഗ്രഹിക്കുന്നില്ല.” ബെനഡിക്ട് പതിനാറാമൻ പപ്പയുടെ വാക്കുകളിൽ “സ്നേഹം നിങ്ങളുടെ അളവുകോലായിരിക്കട്ടെ; നിങ്ങളുടെ വെല്ലുവിളിയെ സ്നേഹിക്കുക; നിങ്ങളുടെ ദൗത്യത്തെ സ്നേഹിക്കുക” എന്നിങ്ങനെ നാം കാണുന്നു.
സ്നേഹത്തോടെ നമ്മുടെ ജീവിതത്തെ കാണാനായാൽ ജീവിതം എളുപ്പമാകും. ജീവിതത്തെ എന്നും ഒരു ഭാരമായിക്കണ്ടാൽ ജീവിതം നിറയെ അസ്വസ്ഥതകളുടെ കൂമ്പാരമായിരിക്കും. ക്രിസ്തു കുരിശിനെ സ്നേഹിച്ചതുകൊണ്ടാണ് കുരിശ് അവനു കൃപയായി മാറിയത്. എന്റെ ഹിതമല്ല; അങ്ങയുടെ ഹിതം എന്ന മനോഭാവത്തോടെ ക്രിസ്തു കുരിശിനെ സ്വീകരിച്ചപ്പോൾ കുരിശിനെപ്രതി പിന്നീട് അവന് പരാതികളില്ലായിരുന്നു. നമുക്കും പ്രാർഥിക്കാം, നാഥാ ജീവിതത്തെ ഭാരമായി കാണാതെ അവയുടെ സഹനത്തെയും വേദനകളെയും സ്നേഹത്തോടെ കാണാൻ ഞങ്ങളെ അനുഗ്രഹിക്കണമേ എന്ന്.
ഫാ. ചാക്കോ വടക്കേത്തലയ്ക്കൽ MCBS
