മുത്തശ്ശീ മുത്തശ്ശന്മാര്‍ക്കും മറ്റു വയോധികര്‍ക്കുമായി ആഗോള ദിനാചരണം പ്രഖ്യാപിച്ച് ഫ്രാന്‍സിസ് പാപ്പ. യേശുവിന്റെ മുത്തശ്ശി മുത്തശ്ശന്മാരും കന്യാമറിയത്തിന്റെ മാതാപിതാക്കളുമായ വി. യോവാക്കിം- അന്ന ദമ്പതികളുടെ തിരുനാളിനോട് അടുത്തുവരുന്ന ജൂലൈയിലെ നാലാം ഞായറാഴ്ചയാണ് ഇതിനായി തിരുസഭ മാറ്റിവയ്ക്കുന്നത്. ജൂലൈ 26-നാണ് ആഗോളസഭയില്‍ വി. യോവാക്കിം- അന്ന ദമ്പതികളുടെ തിരുനാള്‍ ആഘോഷിക്കുന്നത്. അതുപ്രകാരം ഈ വര്‍ഷം ജൂലൈ 25 -നായിരിക്കും പ്രഥമ വയോധിക ദിനാചരണം.
അറിവിന്റെയും അനുഭവത്തിന്റെയും ഉറവിടമായി വയോധികരെ കാണണമെന്നും പ്രയോജനരഹിതരെന്ന മിഥ്യാധാരണയാല്‍ അവര്‍ പുറത്താക്കപ്പെടരുതെന്നുമുള്ള ഓര്‍മ്മപ്പെടുത്തലോടെയായിരുന്നു പാപ്പയുടെ പ്രഖ്യാപനം.
