മധുരം വചനം – നവംബർ 09: ഞാൻ പ്രകാശൻ 

ഫാ. അജോ രാമച്ചനാട്ട്

“അതുകൊണ്ട്‌, നീ വിരുന്നിനു ക്‌ഷണിക്കപ്പെടുമ്പോള്‍ അവസാനത്തെ സ്‌ഥാനത്തുപോയി ഇരിക്കുക. ആതിഥേയന്‍ വന്നു നിന്നോട്‌, സ്‌നേഹിതാ, മുമ്പോട്ടു കയറിയിരിക്കുക എന്നുപറയും. അപ്പോള്‍ നിന്നോടുകൂടെ ഭക്‌ഷണത്തിനിരിക്കുന്ന സകലരുടെയും മുമ്പാകെ നിനക്കു മഹത്വമുണ്ടാകും.”
(ലൂക്കാ 14 : 10)

ഞാൻ പ്രകാശൻ !

ഭൂമിയിലെ ഏറ്റവും വലിയ യുദ്ധം ഏതായിരിക്കും ? എന്റെ ഈഗോയോട് – അഹത്തോട് – ഞാനെന്ന ഭാവത്തോട്‌ – ഉള്ള fight തന്നെ. എത്ര ലളിതമായിട്ടാണ്‌ ക്രിസ്തു ചുറ്റുമുള്ളവരുടെ ചങ്കിലേയ്ക്ക്‌, മുഖം നോക്കാതെ ആ വെല്ലുവിളി ഇട്ടുകൊടുക്കുന്നത്.

പ്രമാണിത്തവും സമ്പന്നതയും കൊട്ടിഘോഷിക്കപ്പെടുന്ന ഇടങ്ങളിൽ എന്റെ തലപ്പാവുകൾ ഊരി താഴെവയ്ക്കണമെന്ന് !
സമൂഹം നൽകിയതും ഞാൻ ആർജ്ജിച്ചെടുത്തതുമായ പദവികളെയും സ്ഥാനങ്ങളെയും പുഞ്ചിരിയോടെ മാറ്റിവയ്ക്കണമെന്ന് !
അടിമത്തഭാവം കൊണ്ടുനടക്കുന്ന സാധാരണക്കാരുടെ നടുവിൽ ചെന്ന് തോളോടുതോൾ ചേർന്നിരിക്കണമെന്ന് !

“എനിക്ക് ശേഷം പ്രളയം” എന്നൊക്കെ ഫ്രാൻസിലെ കുപ്രസിദ്ധചക്രവർത്തി ലൂയി പതിനഞ്ചാമൻ പ്രഖ്യാപിച്ചെന്നു കേട്ടിട്ടുണ്ട്. പൊടുന്നനെ ഞാനില്ലാതായാൽ എൻ്റെ ഓഫീസിനോ, വീടിനോ, ജോലിസ്ഥലത്തിനോ പ്രത്യേകിച്ച് ഒന്നും സംഭവിക്കില്ലെന്ന് മനസ്സിനെ ബോധ്യപ്പെടുത്താനാകണം. ഭൂമിയിലെ ഒരു മരണവും ജീവിതത്തിൻ്റെ സ്വാഭാവിക ചലനങ്ങളെ തടസപ്പെട്ടുത്തിയിട്ടില്ലല്ലോ ഇതുവരെ ?

അതെ, ഞാൻ ഒന്നിൻ്റെയും (ആരുടെയും) അനിവാര്യതയല്ല !

തനിയെ കെട്ടിയ ആകാശക്കൊട്ടാരങ്ങളിൽ നിന്ന് താഴെയിറങ്ങേണ്ട നേരമായി ..
‘ഞാൻ പ്രകാശൻ’ എന്ന സിനിമയിൽ പി.ആർ ആകാശിൽ നിന്ന് പ്രകാശനിലേക്ക് ഇറങ്ങി വന്നതുപോലെ. പഠിക്കാനുണ്ട്, ഒരുപാട് !!

കൃപ നിറഞ്ഞ ദിവസം സ്നേഹപൂർവം ..

ഫാ. അജോ രാമച്ചനാട്ട്

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

അഭിപ്രായങ്ങൾ