നേപ്പാളിൽ രണ്ട് മിഷനറിമാരെ മതപരിവർത്തനം ആരോപിച്ച് അറസ്റ്റ് ചെയ്തു

ചാരിറ്റിസ് സിസ്റ്റേഴ്‌സ് ഓഫ് സെന്റ് പോൾ കോൺഗ്രിഗേഷനിൽ നിന്നുള്ള രണ്ട് കൊറിയൻ മിഷനറിമാരെ നേപ്പാളിൽ അറസ്റ്റ് ചെയ്യുകയും ജാമ്യം നിഷേധിക്കുകയും ചെയ്തു. സെപ്റ്റംബർ 14 -ന് രാത്രി നേപ്പാൾ തലസ്ഥാനമായ കാഠ്മണ്ഡുവിൽ നിന്ന് 200 കിലോമീറ്റർ അകലെയുള്ള പൊഖാറയിൽ ജോലി ചെയ്തിരുന്ന സി. ജെമ്മ ലൂസിയ കിം, സി. മാർത്ത പാർക്ക് എന്നിവരെയാണ് മതപരിവർത്തന പ്രവർത്തനങ്ങൾ ആരോപിച്ച് ലോക്കൽ പോലീസ് അറസ്റ്റ് ചെയ്തത്.

സെപ്തംബർ 27 വരെ ഈ സന്യാസിനിമാർക്ക് ജാമ്യം നിഷേധിച്ചിരുന്നു. അതിനെ തുടർന്ന് അവർ പോലീസ് കസ്റ്റഡിയിൽ ആയിരുന്നു. “രാജ്യത്തെ കത്തോലിക്കാ സമൂഹം വിധി കേട്ട് ഞെട്ടിയിരിക്കുകയാണ്. ഈ സന്യാസിനിമാർക്ക് ജാമ്യം ലഭിക്കും എന്ന് പ്രതീക്ഷിച്ചിരുന്നെങ്കിലും കോടതിയുടെ തീരുമാനം അവർക്ക് എതിരായിരുന്നു,” -നേപ്പാളിലെ അപ്പസ്തോലിക് വികാരി ബിഷപ്പ് പോൾ സിമി പറഞ്ഞു.

പൊഖാറ ചേരി പ്രദേശത്ത് കോവിഡ് പകർച്ചവ്യാധിയുടെ സമയത്ത് ഏറ്റവും ദുർബലരായ ആളുകൾക്ക് ഭക്ഷണം നല്കാനും സഹായം എത്തിക്കാനും ഈ സന്യാസിനിമാർ മുൻപന്തിയിൽ തന്നെയുണ്ടായിരുന്നു. ഭക്ഷണത്തിന് പകരമായി പാവപ്പെട്ടവരെ കത്തോലിക്കാ വിശ്വാസത്തിലേക്ക് പരിവർത്തനം ചെയ്യാൻ ശ്രമിച്ചു എന്നതാണ് ഇവർക്കെതിരെ ആരോപിക്കുന്ന കുറ്റം.

“മതപരിവർത്തനം സംബന്ധിച്ച ആരോപണങ്ങൾ തികച്ചും അടിസ്ഥാനരഹിതവും അന്യായവുമാണ്. ഈ ആരോപണം ഈ സന്യാസിനിമാരെ കുറ്റപ്പെടുത്തുന്നവരുടെ അസഹിഷ്ണുത മാത്രമല്ല, പാവപ്പെട്ടവരുടെ ആവശ്യങ്ങളെക്കുറിച്ചുള്ള അജ്ഞതയും വെളിപ്പെടുത്തുന്നു. കത്തോലിക്കർ എന്ന നിലയിൽ ഞങ്ങൾ നിർബന്ധിത മതപരിവർത്തനത്തിൽ ഏർപ്പെടുന്നില്ല. ഇത്രയും വർഷമായി ഈ സന്യാസിനിമാർ പൂർണ്ണമായും ദരിദ്രർക്കായി സേവനം ചെയ്തുകൊണ്ടാണ് ഇവിടെ സേവനം അനുഷ്ഠിച്ചത്. ഈ സംഭവത്തെ ക്കുറിച്ച് ആഴത്തിലുള്ള അന്വേഷണം വേണമെന്ന് അഭ്യർത്ഥിച്ചിട്ടുണ്ട്.” -ബിഷപ്പ് പറഞ്ഞു.

ചെയ്യാത്ത കുറ്റത്തിന് തടവിലായിരുന്ന കുറ്റാരോപിതരായ ഈ സന്യാസിനിമാർ ഒരു പ്രത്യേക പരിഗണനയും ലഭിക്കാതെ മറ്റ് തടവുകാരെപ്പോലെയാണ് ഇപ്പോൾ ജീവിക്കുന്നത്. പ്രായമായ ഈ സന്യാസിനിമാരുടെ ആരോഗ്യത്തെക്കുറിച്ച് തനിക്ക് ആശങ്കയുണ്ടെന്നും അദ്ദേഹം വെളിപ്പെടുത്തി. അവരുടെ അടുത്ത ജാമ്യാപേക്ഷ ഒക്ടോബർ 28 -ന് പരിഗണിക്കും.

കത്തോലിക്കാ സമൂഹം ഈ സംഭവത്തെ ന്യൂനപക്ഷ സമുദായങ്ങൾക്കെതിരായ ആക്രമണമായാണ് കാണുന്നത്. സാമൂഹ്യസേവനങ്ങൾ, വിദ്യാഭ്യാസം, വൈദ്യസഹായം തുടങ്ങിയ ക്രിസ്ത്യൻ മിഷനറിമാരുടെ പ്രവർത്തനങ്ങൾ മതപരിവർത്തനം ആരോപിച്ചുകൊണ്ട് കുറ്റകരമാക്കി മാറ്റാനുള്ള ശ്രമമാണ് നടക്കുന്നതെന്ന് ബിഷപ്പ് ചൂണ്ടിക്കാട്ടി.

 

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.