ചോദിച്ചു വാങ്ങാന്‍ പൊതുവേ നമുക്ക് മടിയാണ്. എന്നാൽ പരസ്പര ബന്ധങ്ങള്‍ ഊഷ്മളമാകണമെങ്കില്‍ ഈ സ്വഭാവികമായ മടിയെ നാം അതിജീവിക്കണം. പ്രിയപ്പെട്ടവരോട് നമുക്ക് ചോദിച്ചു വാങ്ങാന്‍ സാധിക്കണം. പ്രിയപ്പെട്ടവരുടെ മുമ്പില്‍ നമ്മുടെ ഉള്ളിന്റെയുള്ളിലെ ആഗ്രഹം വെളിപ്പെടുത്താൻ സാധിക്കണം. ചോദിച്ചു വാങ്ങലിലൂടെയും കൊടുക്കലിലൂടെയുമാണ് സ്‌നേഹബന്ധം വളരുകയും പൂര്‍ണ്ണമാകുകയും ചെയ്യുന്നതെന്ന സത്യം നമ്മൾ മറക്കരുത്.
ഈശോയും ഈ കാര്യമാണ് നമ്മെ ഓർമ്മിപ്പിക്കുന്നത്. “എന്റെ നാമത്തിൽ പിതാവിനോട് ചോദിക്കുന്നതെല്ലാം അവിടുന്ന് നിങ്ങൾക്ക് നൽകും” (16:24). ചോദിക്കുക എന്നത് അപ്പോൾ പ്രധാനമായി വരുന്നു. എല്ലാം ചോദിക്കാനുള്ള സ്വാതന്ത്ര്യം നമ്മൾ ദൈവവുമായുള്ള ബന്ധത്തിൽ നേടിയെടുക്കണം. ഊഷ്മളമാകട്ടെ ദൈവവുമായുള്ള നമ്മുടെ ബന്ധം. ദൈവം നമ്മുടെ പ്രിയപ്പെട്ടവനാണെങ്കിൽ ചോദിക്കാൻ നമുക്ക് എളുപ്പമായിരിക്കും.
ഫാ. ജി കടൂപ്പാറയിൽ MCBS
