ജോസഫ് ചിന്തകൾ 286: ഈശോയുടെ മുഖമുള്ള യൗസേപ്പിതാവ്

ജർമ്മനിയിലെ ബവേറിയൻ സംസ്ഥാനത്തിലെ മിറ്റൻവാൾഡ് (Mittenwald) എന്ന സ്ഥലത്തുള്ള വി. യൗസേപ്പിതാവിന്റെ നാമത്തിലുള്ള ഒരു ചെറിയ യൗസേപ്പ് കപ്പേളയിലെ ചിത്രമാണ് ഇന്നത്തെ ജോസഫ് ചിന്തയുടെ ആധാരം. 1689 -ൽ കേവലം കുരിശടി മാത്രമായിരുന്ന ഈ ചെറിയ കപ്പേള 2000-2002 വർഷങ്ങളിൽ നവീകരിക്കുകയും യൗസേപ്പിതാവിന്റെയും ഉണ്ണിശോയുടെയും ചിത്രം സ്ഥാപിക്കുകയും ചെയ്തു.

ഈ ചിത്രത്തിലെ യൗസേപ്പിതാവിന്റെ മുഖഛായ ഈശോയുടെതു പോലെയാണ്. ആശാരിപ്പണി എടുക്കുന്നതിനിടയിൽ യൗസേപ്പിതാവ് ഉണ്ണീശോയെ മടിയിലിരുത്തി അല്പം ലാളിക്കുന്നു. അദ്ധ്വാനത്തിന്റെ ക്ഷീണം യൗസേപ്പിതാവിന്റെ മുഖത്തുണ്ടെങ്കിലും ഈശോയെ പരിചരിക്കാൻ ആ നല്ല പിതാവ് സമയം കണ്ടെത്തുന്നു. ജോലിത്തിരക്കുകൾക്കിടയിൽ മക്കളോടുള്ള കടമ മറക്കുന്നവർക്കുള്ള ഒരു ഓർമ്മപ്പെടുത്തലാണ് ഈ ചിത്രം.

യൗസേപ്പിതാവിന്റെ അരയിൽ കെട്ടിയിരിക്കുന്ന ചരടിൽ ഉണ്ണീശോ പിടിച്ചിരിക്കുന്നു. അവർ തമ്മിലുള്ള ആന്തരികബന്ധത്തിന്റെ അടയാളമാണത്. യൗസേപ്പിതാവിന്റെ കൈവശം കാണുന്ന ലില്ലിപുഷ്പം ഈ ചിത്രത്തിൽ ഉണ്ണീശോയാണ് പിടിച്ചിരിക്കുന്നത്. തന്റെ വളർത്തുപിതാവിന്റെ പരിശുദ്ധിയും നിർമ്മലതയും ഉണ്ണീശോ ലോകത്തോടു പ്രഘോഷിക്കുകയാണിവിടെ.

നമ്മൾ കണ്ടുശീലിച്ച ഈശോയുടെ പരസ്യജീവിതത്തിലെ മുഖത്തിന് ഈ ചിത്രത്തിലെ യൗസേപ്പിതാവിന്റെ മുഖഛായയാണ്. ദൈവഹിതം പരാതിയോ, പരിഭവമോ ഇല്ലാതെ അനുസരിച്ച് അത് നിറവേറ്റി ജീവിച്ച യൗസേപ്പിതാവിന് ദൈവപിതാവ് നൽകിയ അംഗീകാരമായി യൗസേപ്പിതാവിന്റെ ഈ മുഖത്തെ നമുക്കു കാണാൻ കഴിയും. യൗസേപ്പിതാവിന്റെ പക്കലണയുന്നവർ അവസാനം ഈശോയുടെ പക്കലെത്തും എന്ന വലിയൊരു സന്ദേശവും ഈ ചിത്രം നൽകുന്നു.

ഫാ. ജയ്സൺ കുന്നേൽ MCBS 

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.