ജോസഫ് ചിന്തകൾ 130: പരിശുദ്ധ ത്രീത്വത്തോടൊപ്പമുള്ള യൗസേപ്പിതാവിന്റെ ചിത്രം

പരിശുദ്ധ ത്രീത്വത്തോടൊപ്പമുള്ള യൗസേപ്പിതാവിന്റെ ചിത്രമാണ് ഇന്നത്തെ ജോസഫ് ചിന്തയുടെ ആധാരം.

പതിനെട്ടാം നൂറ്റാണ്ടിൽ ഏകദേശം 1727-ാം ആണ്ടിൽ ഇറ്റാലിയൻ ചിത്രകാരനായ ജൊവാന്നി അന്തോനിയോ പെല്ലെഗ്രീനി വരച്ച ഓയിൽ പെയിൻ്റിങ്ങാണ് The Holy Trinity with Saints Joseph and Francesco di Paola. ഈ ചിത്രത്തിൽ പരിശുദ്ധ ത്രീത്വത്തെ പരമ്പരാഗത പാശ്ചാത്യ ചിന്താധാര പോലെ ചിത്രീകരിച്ചിരിക്കുന്നു. പുത്രൻ കുരിശുമായി പിതാവായ ദൈവത്തിന്റെ വലതുഭാഗത്ത് ഉപവിഷ്ടനായിരിക്കുന്നു. പരിശുദ്ധാത്മാവിന് ഒരു പ്രാവിന്റെ രൂപത്തിൽ പിതാവിന്റെയും പുത്രന്റെയും ഇടയിൽ സ്ഥാനം നൽകിയിരിക്കുന്നു. പരിശുദ്ധ കന്യകാമറിയത്തിനോ ഉണ്ണീശോയ്ക്കോ ഈ ചിത്രത്തിൽ സ്ഥാനമില്ല. ഫ്രാഞ്ചെസ്കോ ദി പൗള എന്ന വിശുദ്ധൻ മുട്ടുകുത്തി നിന്ന് പരിശുദ്ധ ത്രീത്വത്തെ ആരാധിക്കുമ്പോൾ യൗസേപ്പിതാവിനെ സ്വർഗ്ഗീയപിതാവിന്റെ സാദൃശ്യത്തിൽ ഭൂമിയിലെ വളർത്തുപിതാവായി ചിത്രീകരിച്ചിരിക്കുന്നു.

സ്വർഗ്ഗീയപിതാവിന്റെ ഭൂമിയിലെ പ്രതിനിധിയായി യൗസേപ്പിനെ ഈ ചിത്രത്തിൽ ചിത്രീകരിക്കുമ്പോൾ ഉണ്ണീശോയുടെ ഭൂമിയിലെ കാവൽക്കാരൻ എന്നതിനപ്പുറം സ്വർഗ്ഗത്തിലെ ശക്തനും വിശ്വസ്തനുമായ ഒരു മദ്ധ്യസ്ഥനായി അന്തോനിയോ വരച്ചിക്കുന്നു.

പരിശുദ്ധ ത്രീത്വത്തോടുള്ള യൗസേപ്പിതാവിന്റെ ബന്ധത്തെയും ഇത് വരച്ചുകാട്ടുന്നു. യൗസേപ്പ് ദൈവപിതാവിന്റെ പ്രതിനിധിയും ദൈവപുത്രന്റെ വളർത്തുപിതാവും പരിശുദ്ധാത്മാവിന്റെ സ്നേഹിതനുമാണ്. ഈ ശക്തനായ മദ്ധ്യസ്ഥനെ നമുക്കും മറക്കാതിരിക്കാം.

ഫാ. ജയ്സൺ കുന്നേൽ MCBS 

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്. ദയവായി അസഭ്യവും നിയമവിരുദ്ധവും സ്പര്‍ധ വളര്‍ത്തുന്നതുമായ പരാമർശങ്ങളും, വ്യക്തിപരമായ അധിക്ഷേപങ്ങളും ഒഴിവാക്കുക. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്. വായനക്കാരുടെ അഭിപ്രായ പ്രകടനങ്ങൾക്ക് ലൈഫ്ഡേ ഉത്തരവാദിയായിരിക്കില്ല.

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.