ദൈവത്തോടു ചേര്‍ന്നുനിന്ന് ആത്മീയമായി വളരാന്‍ ആഗ്രഹിക്കുന്നവര്‍ ജാഗ്രത പുലര്‍ത്തേണ്ട ഒരു അപകടകരമായ തിന്മയാണ് ആത്മീയ അഹങ്കാരം. അത് ശരിയായ വിശുദ്ധി പ്രാപിക്കുന്നതിന് നമുക്ക് തടസ്സമായി നില്‍ക്കും.
എനിക്ക് ഞാന്‍ മാത്രം മതി, എനിക്ക് എല്ലാം തനിയെ ചെയ്യാനാകും എന്ന് ചിന്തിക്കുകയും അങ്ങനെ ചിന്തിക്കാന്‍ പ്രോത്സാഹിപ്പിക്കുകയും ചെയ്യുന്ന ഒരു കാലഘട്ടമാണിത്. നിങ്ങള്‍ ആത്മീയപാതയിലൂടെ സഞ്ചരിക്കാന്‍ ഇഷ്ടപ്പെടുന്ന വ്യക്തിയാണെങ്കില്‍ അധികം വൈകാതെ സ്വന്തം കഴിവ് കൊണ്ട് വിശുദ്ധനായി തീരാം എന്നൊരു തെറ്റിദ്ധാരണ ഉള്ളില്‍ കയറിക്കൂടാന്‍ സാധ്യതയുണ്ട്.
ഈ തിന്മ മൂലം മറ്റുള്ളവരുടെ ഉപദേശങ്ങളും മാര്‍ഗ്ഗനിര്‍ദ്ദേശങ്ങളും സ്വീകരിക്കാന്‍ നമുക്ക് മനസ്സുണ്ടാവുകയില്ല. നമുക്ക് തോന്നിയ രീതിയില്‍ നാം ക്രൈസ്തജീവിതം നയിക്കാന്‍ ഒരുമ്പെടുന്നു. ആത്മീയജീവിതത്തെ നാം ഇഷ്ടമുള്ളതുപോലെ വ്യാഖ്യാനിക്കുകയും ചെയ്യുന്നു. ഇതേക്കുറിച്ച് വി. ജോണ്‍ ഓഫ് ദ ക്രോസ് പറയുന്നത് ശ്രദ്ധിക്കുക: “ഗുരു ഇല്ലാത്തതും ഏകാകിയുമായ ഒരു പുണ്യാത്മാവ് എരിയുന്ന കല്‍ക്കരി പോലെയാണ്. ചൂട് കൂടുന്നതിനു പകരം അത് വൈകാതെ തണുത്തു പോകും.”
വിശുദ്ധര്‍ വിശുദ്ധി നേടിയെടുത്തത് സ്വന്തം ശക്തി കൊണ്ടല്ല. കത്തോലിക്കാ സഭയിലെ ഏറ്റവും വലിയ മിസ്റ്റിക്കുകള്‍ പോലും ആത്മീയോന്നതി പ്രാപിച്ചത് ആത്മീയ മാര്‍ഗ്ഗദര്‍ശികളുടെ സഹായത്താലാണ്. ഒരു വിശുദ്ധന് ഏറ്റവും അത്യാവശ്യമായി വേണ്ട പുണ്യം എളിമയാണ്. അതുകൊണ്ട് എളിമയുള്ള ഹൃദയത്തോടെ ദൈവതിരുമുമ്പില്‍ വ്യാപരിക്കാന്‍ ശ്രദ്ധിക്കാം.
