തീവ്രവാദികളുടെ ഭീഷണികള്ക്ക് ഇടയിലും മതപരമായ പീഡനങ്ങള്ക്കിടയിലും പാക്കിസ്ഥാനിലെ സഭ ദൈവവിളികളാല് സമ്പുഷ്ഠമാവുകയാണ്. ഫ്രാന്സിസ്കന് സന്യാസ സമൂഹത്തില് നിന്നാണ് ഏഴു വൈദികര് പൗരോഹിത്യത്തിലൂടെ ക്രിസ്തുവിനെ നല്കുവാനുള്ള ദൗത്യം ഏറ്റെടുത്തത്.
പാക്കിസ്ഥാനിലെ ക്രൈസ്തവര് ഈ പൗരോഹിത്യ സ്വീകരണം ഒരു വലിയ ആഘോഷമായാണ് കൊണ്ടാടിയത്. ‘ ഇതു ഞങ്ങള്ക്ക് സന്തോഷത്തിന്റെ ഒരു അവസരമാണ്. ഇവര് ക്രിസ്തുവിന്റെ വിശ്വസ്തരായി എന്നും നിലകൊള്ളട്ടെ. ജാതിമതഭേദമന്യേ എല്ലാര്ക്കും മുന്പില് ക്രിസ്തുവിന്റെ സാക്ഷ്യമായി മാറുവാന് ദൈവം അനുഗ്രഹിക്കട്ടെ’ എന്ന് ഫാ. ഫ്രാന്സിസ് നദീം ഒ.എഫ്.എം പറഞ്ഞു .
ഫാ. ബാബര് ഖുശി, ഫാ . മാസം ഇല്യാസ്, ഫാ. അക്വീല് ആഷിക്, ഫാ . ബാഷര് ശുഹാബ്, ഫാ . അട്ടിസ് അല്ഫോന്സെ, ഫാ.ഇര്ഫാന് സാബിര്, ഫാ. ഫൈസല് ഫ്രാന്സിസ് എന്നിവരാണ് നവ സന്യാസികള്. നവംബര് 30 നു ലാഹോറിലെ സേക്രട്ട് ഹാര്ട്ട് കത്തീഡ്രലില് വെച്ച് നടന്ന പൗരോഹിത്യ സ്വീകരണത്തില് ആര്ച്ച് ബിഷപ്പ് സെബാസ്റ്റ്യന് ഫ്രാന്സിസ് ഷാ മുഖ്യ കാര്മികത്വം വഹിച്ചു.