ആത്മീയജീവിതത്തെ ശക്തിപ്പെടുത്തുന്ന ജപമാല

ദൈവം നമുക്ക് നൽകിയിട്ടുള്ള ഏറ്റവും ശക്തമായ പ്രാർത്ഥനയാണ് ജപമാല. സാത്താനെയും അവന്റെ കൂട്ടുകാരെയും പ്രലോഭനങ്ങളെയും നമ്മുടെ ജീവിതത്തിൽ നിന്നും ജീവിതസാഹചര്യങ്ങളിൽ നിന്നും അകറ്റിനിർത്താൻ ജപമാല പ്രാർത്ഥനയോളം ശക്തിയുള്ള മറ്റൊരു പ്രാർത്ഥനയില്ല. നിരാശയും ഭയവും സന്തോഷമില്ലായ്മയും ഉണ്ടാകുന്ന സമയങ്ങളിൽ നമ്മുടെ ജീവിതത്തിൽ പ്രകാശം പരത്താൻ, പ്രത്യാശയിലേക്ക് കൈപിടിച്ചു കയറ്റുവാൻ ഈ പ്രാർത്ഥനക്കു കഴിയും.

ഇനി എപ്പോഴാണ് നിരാശയും ഭയവും അസന്തുഷ്ടിയും നമ്മുടെ ജീവിതത്തെ വലക്കുക? അത് ദൈവത്തിൽ നിന്ന് അകലുമ്പോൾ തന്നെ. ദൈവത്തോട് ചേർന്നുനിൽക്കുമ്പോൾ നമ്മുടെ ജീവിതത്തിൽ ദൈവം അനുവദിക്കുന്ന സഹനങ്ങളെ നാം പ്രത്യാശയോടെ സ്വീകരിക്കും. മറിച്ചാണെങ്കിലോ, നിരാശയിലേയ്ക്ക് കൂപ്പുകുത്തും. ദൈവത്തിൽ നിന്ന് അകലുന്തോറും നമ്മുടെയുള്ളിൽ നിരാശയുടെ വിത്തുകൾ സാത്താൻ വിതക്കും. എന്നാൽ, ശക്തമായ ആത്മീയടിത്തറയുള്ള വ്യക്തികളിൽ നിന്ന് സാത്താൻ അകന്നുനിൽക്കുക തന്നെ ചെയ്യും. ആത്മീയജീവിതം കൂടുതൽ ശക്തമാക്കാൻ ജപമാല പ്രാർത്ഥനക്കു കഴിയും. അത് പ്രധാനമായും നാല് മാർഗ്ഗങ്ങളിലൂടെയാണ് സംഭവിക്കുക. ആ മാർഗ്ഗങ്ങളിലൂടെ കടന്നുപോകാം.

1. സമാധാനം ചൊരിയുന്ന ജപമാല പ്രാർത്ഥന

നമ്മുടെ മനസ്സിൽ ആകുലതകളും വിഷമങ്ങളും തിങ്ങിനിറഞ്ഞിരിക്കുന്ന സമയത്ത് ശരിയായി ചിന്തിക്കാനോ, പ്രാർത്ഥിക്കാനോ നമുക്ക് കഴിയില്ല. എന്തിന് ഒന്ന് സ്വസ്ഥമായി ഇരിക്കാൻ പോലും കഴിയില്ല എന്നതാണ് സത്യം. തീർത്തും അസ്വസ്ഥമായ അവസ്ഥയിൽ ജപമാല പ്രാർത്ഥന കണ്ണുനീരോടെ അർപ്പിക്കുന്ന ഏതൊരു വ്യക്തിയിലേക്കും വലിയ ഒരു ശാന്തത കടന്നുവരും. നിരാശയുടെ ഇരുൾനിറഞ്ഞ ഉള്ളുകളിൽ പ്രത്യാശയുടെ വെളിച്ചം വിതറാനും നമുക്ക് സ്വർഗ്ഗത്തിൽ ഒരു അമ്മയുണ്ട് എന്ന ബോധ്യത്തിലേക്കു വളരാനും അമ്മയുടെ കരം പിടിച്ച് ഈശോയിലേക്ക് എത്താനും ജപമാല പ്രാർത്ഥന സഹായിക്കും. ഇത്തരത്തിലൊരു ആത്മീയവളർച്ചയിക്ക് കടന്നുവരുന്ന ഓരോ വ്യക്തിയും പടിപടിയായി ദൈവത്തിലേക്കും അവിടുത്തെ സമാധാനത്തിലേക്കും എത്തുന്നു.

2. വിശ്വാസം നവീകരിക്കുന്ന പ്രാർത്ഥന

അർത്ഥം മനസിലാക്കി അർപ്പിക്കുന്ന ഓരോ ജപമാല പ്രാർത്ഥനയും നമ്മുടെ ഉള്ളിലുള്ള വിശ്വാസത്തെ ബലപ്പെടുത്തുകയും ആഴപ്പെടുത്തുകയും ചെയ്യുന്നുണ്ട്. കാരണം, ജപമാല വെറും ഒരു പ്രാർത്ഥനയല്ല. മറിയത്തോടു ചേർന്ന് ഈശോയെ സ്തുതിക്കുകയാണ് ചെയ്യുന്നത്. ഈ പ്രാർത്ഥന മറിയത്തിന്റെ കരം പിടിച്ച് ഈശോയിലേക്കുള്ള ഒരു യാത്രയാണ്. അതിനാൽ തന്നെ ഓരോ നിമിഷവും നമ്മുടെ വിശ്വാസത്തെ അത് നവീകരിച്ചുകൊണ്ടിരിക്കുന്നു. ഒപ്പം തന്നെ, ദൈവഹിതം നടപ്പിലാക്കാനും പരീക്ഷണങ്ങളെ മറികടക്കാനും പ്രത്യാശയിൽ നിലനിൽക്കാനും ജപമാല പ്രാർത്ഥന നമ്മെ സഹായിക്കുന്നു.

3. പാപങ്ങൾക്കെതിരെ പോരാടാൻ ശക്തി പ്രദാനം ചെയ്യുന്നു

പരിശുദ്ധ അമ്മയോട് ചേർന്നുനിൽക്കുമ്പോൾ നമുക്ക് ലഭിക്കുന്ന ഒരു അനുഗ്രഹമാണ് പാപങ്ങളെയും പാപസാഹചര്യങ്ങളെയും അതിജീവിക്കാനുള്ള പ്രത്യേക കൃപ. നമ്മുടെ പാപം തന്റെ മകനായ ഈശോയെ വേദനിപ്പിക്കും എന്ന് അറിയുന്ന പരിശുദ്ധ അമ്മ, തന്നോട് ചേർന്നുനിൽക്കുന്ന ഓരോ വ്യക്തിയും പാപത്തിൽ വീഴാതിരിക്കാൻ പ്രത്യേക സംരക്ഷണം നൽകുന്നു. ഒപ്പം തന്നെ, സാത്താന്റെ പ്രലോഭനങ്ങളെ മനസിലാക്കുവാനും അതിൽ നിന്ന് അകന്നുനിൽക്കാനും നമ്മെ സഹായിക്കുന്നുണ്ട്.

അനുദിനം ജപമാല ചൊല്ലി മറിയത്തിന്റെ മാദ്ധ്യസ്ഥ്യത്തിന് തന്നെത്തന്നെ സമർപ്പിക്കുന്നവരിൽ നിന്ന് സാത്താൻ അകന്നുനിൽക്കും. പാപക്കറ കൂടാതെ ജനിക്കുകയും ദൈവപുത്രന്റെ മാതാവായി ദൈവം തിരഞ്ഞെടുക്കുകയും ചെയ്ത പരിശുദ്ധ കന്യകാമറിയം, നമ്മെ ജീവിതവിശുദ്ധി കൈവരിക്കുന്നതിനും തന്റെ തിരുക്കുമാരന് ഇഷ്ടമുള്ളവരാക്കി വളർത്തുന്നതിനും സദാ ശ്രദ്ധാലുവാണ്.

4. കൂദാശകളിലേയ്ക്ക് നമ്മെ അടുപ്പിക്കുന്ന ജപമാല

ഒരാളുടെ ആത്മീയജീവിതം ശക്തമാകുന്നത് പ്രാർത്ഥനയുടെയും അനുദിനമുള്ള കൂദാശ സ്വീകരണത്തിലൂടെയുമാണ്. വിശുദ്ധ കുർബാന, കുമ്പസാരം തുടങ്ങിയ കൂദാശകളുടെ അടുത്തടുത്ത സ്വീകരണം നമ്മെ വിശുദ്ധിയിലേക്കു നയിക്കുന്നു. ഈ കൂദാശകളുമായി അടുത്ത ബന്ധം സ്ഥാപിക്കുവാനും അവ ഒരുക്കത്തോടെ സ്വീകരിക്കുവാനും ജപമാല പ്രാർത്ഥന നമ്മെ സഹായിക്കുന്നുണ്ട്.

ജപമാല പ്രാർത്ഥന ഭക്തിപൂർവ്വം ചൊല്ലുന്നവരിൽ, വിശുദ്ധിയിൽ നിലനിൽക്കുവാനും ജീവിക്കുവാനുമുള്ള വലിയ ആഗ്രഹം വർഷിക്കപ്പെടുന്നു. വിശുദ്ധിക്കായുള്ള തീവ്രമായ ആഗ്രഹം നമ്മെ കുമ്പസാരം എന്ന കൂദാശയിലേക്കും വിശുദ്ധ കുര്‍ബാനയിലേക്കും അടുപ്പിക്കുന്നു. ഒപ്പം തന്നെ, ജപമാല രഹസ്യങ്ങൾ ദിവ്യകാരുണ്യഭക്തിയിലേക്കും നമ്മെ നയിക്കുന്നു.