വലൻസിയയിലെ ഔർ ലേഡി ഓഫ് ഹോപ്പ് ദൈവാലയത്തിലെ വൈദികനായിരുന്നു ഫാ. റോബർട്ട് റാമിയസ് മയോർഗെ. ഉപരിപഠനത്തിനായി 2017 -ലാണ് ജോൺ പോൾ രണ്ടാമൻ പൊന്തിഫിക്കൽ ഇൻസ്റ്റിറ്റ്യൂട്ടില്‍ അദ്ദേഹം എത്തിയത്. 50 -കാരനായ അദ്ദേഹം ഏണസ്റ്റ് ലൂക് സെന്റർ ആശുപത്രിയിലെ ചാപ്ലൈയ്നും കൂടിയായിരുന്നു. 2019 -ൽ കൊറോണ വൈറസ് ലോകത്തെ കീഴടക്കിയപ്പോൾ അദ്ദേഹം രോഗികളെ ശുശ്രൂഷിക്കുവാൻ ആശുപത്രിയിൽ നിസ്വാർത്ഥമായി സേവനം ചെയ്തു. ജപമാലയെ മുറുകെ പിടിച്ചുകൊണ്ട് അദ്ദേഹം രോഗികൾക്കിടയില്‍ പരിശുദ്ധ അമ്മയുടെയും ക്രിസ്തുവിന്റെയും സൗരഭ്യം പകർന്നു.
രോഗികളുടെ ആശ്വാസ കേന്ദ്രമായ ഈ വൈദികൻ എപ്പോഴും തികഞ്ഞ നർമ്മബോധവും ഉത്സാഹവും കാത്ത് സൂക്ഷിച്ചിരുന്നുവെന്ന് അദ്ദേഹം ശുശ്രൂഷിച്ചവരും സഹ വൈദികരും അഭിപ്രായപ്പെടുന്നു. രോഗികളെ പരിചരിക്കുന്നതിനിടയിൽ ആണ് അദ്ദേഹത്തിന് കോവിഡ് ബാധിക്കുന്നത്. മരുന്നുകൾകൊണ്ടും പ്രാർത്ഥനകൾ കൊണ്ടും രക്ഷപെടുത്തുവാൻ സാധിക്കാത്ത അവസ്ഥ. മൂന്നാഴ്ചത്തെ ചികിത്സയ്ക്ക് ശേഷം അദ്ദേഹം ഫെബ്രുവരി 17 -ന് മരണമടഞ്ഞു.
ഏവർക്കും പ്രിയങ്കരനായ ഈ വൈദികന്റെ വേർപാട് ഏവരെയും ദുഃഖത്തിലാഴ്ത്തി. ദമ്പതികൾക്കിടയിലെ അസ്വാരസ്യങ്ങൾ പരിഹരിക്കുവാനും അവരെ ഒരു പുതിയ ജീവിതത്തിലേക്ക് തിരികെ കൊണ്ടുവരുവാനും ഫാ. റോബെർട്ടിന് പ്രത്യേക വൈദഗ്ധ്യം ഉണ്ടായിരുന്നു. അദ്ദേഹത്തിന്റെ സേവന മനോഭാവത്തിനെയും ത്യാഗ സന്നദ്ധതയെയും വിശ്വാസികളും ഇടവകാ ജനങ്ങളും നന്ദിപൂർവം ഓർക്കുന്നു.
