പകലിന്റെ അദ്ധ്വാനങ്ങളും ക്ഷീണവും കഴിഞ്ഞ് രാത്രി ഉറങ്ങാനായി കിടക്കുന്നതിനു മുമ്പ് എന്തെങ്കിലുമൊക്കെ പ്രാര്‍ത്ഥനകള്‍ ചൊല്ലി ദൈവത്തെ ഓര്‍ക്കുന്നവരാണ് എല്ലാവരും. ഉറക്കത്തിന് മുമ്പും ഉറക്കസമയത്തും ഉറങ്ങി എഴുന്നേല്‍ക്കുമ്പോഴും അത്ഭുതകരമായ സമാധാനവും ആനന്ദവും മനസില്‍ നിറയ്ക്കുന്ന ഒരു ചെറുപ്രാര്‍ത്ഥനയുണ്ട്. വിശുദ്ധരടക്കമുള്ള അനേകര്‍ സാക്ഷ്യപ്പെടുത്തിയിട്ടുള്ള ആ പ്രാര്‍ത്ഥന നമുക്ക് നല്‍കിയതും ക്രിസ്തു തന്നെയാണ്; അതും കുരിശില്‍ വച്ച്. ആ പ്രാര്‍ത്ഥന ഇപ്രകാരമാണ്: “പിതാവേ, എന്റെ ആത്മാവിനെ അങ്ങേ കരങ്ങളില്‍ ഞാന്‍ സമര്‍പ്പിക്കുന്നു.” ആര്‍ക്കും എളുപ്പത്തില്‍ ചൊല്ലാവുന്ന പ്രാര്‍ത്ഥന; അതേസമയം അതിശക്തമായ ഒരു പ്രാര്‍ത്ഥന.
വി. ജോണ്‍ ഇരുപത്തിമൂന്നാമന്‍ പാപ്പാ ഈ പ്രാര്‍ത്ഥനയായിരുന്നു ദിവസവും ഉറക്കത്തിനു മുമ്പ് ചൊല്ലിയിരുന്നത്. സഭയുടെ തലവനായിരുന്ന അദ്ദേഹം ഇതുകൂടി കൂട്ടിച്ചേര്‍ത്തിരുന്നു: “ഇത് നിന്റെ സഭയാണ്, ഞാന്‍ ഉറങ്ങാന്‍ പോകുന്നു” എന്ന്.
നമ്മുടെ മനോഭാവവും ഇതു തന്നെയായിരിക്കട്ടെ. എല്ലാം ദൈവത്തിന് സമര്‍പ്പിച്ച് നമുക്ക് സ്വസ്ഥമായി ഉറങ്ങാം.
