കൊറോണാ മഹാമാരിയുടെ നടുവില്‍ നട്ടംതിരിയുന്ന ലോകജനതയെ ഉത്ഥിതന്റെ സന്ദേശത്താല്‍ സധൈര്യരാക്കി ഫ്രാന്‍സിസ് പാപ്പ. മരണത്തെ തോല്‍പ്പിച്ച് ഉയിര്‍ത്തെഴുന്നേറ്റ ക്രിസ്തുവിലുള്ള വിശ്വാസം ഈ ദാരുണ ദിനങ്ങളെ മറികടക്കാന്‍ നമ്മെ സഹായിക്കുമെന്ന് പാപ്പാ പറഞ്ഞു.
മഹാമാരിയില്‍ മരണമടഞ്ഞവരെയോര്‍ത്ത് വിലപിക്കുന്ന കുടുംബങ്ങളോടുള്ള തന്റെ ആത്മീയ സാമീപ്യവും പാപ്പ അറിയിച്ചു: ‘വിടപറയാന്‍ കഴിയാതെ വിടവാങ്ങുന്നവരും ഭൂമിയില്‍ അവശേഷിക്കുന്നവരും വലിയ വേദനയാണ്. മരണത്തെ ജയിച്ചവനാണ് ക്രിസ്തു. അതിനാല്‍ ഉയിര്‍ത്തെഴുന്നേറ്റ ക്രിസ്തുവിലുള്ള വിശ്വാസം ഈ ദാരുണമായ നിമിഷങ്ങളെ മറികടക്കാന്‍ നമ്മെ സഹായിക്കും. പ്രത്യാശ നമ്മുക്ക് കരുത്തു പകരും.’
യുവജനത്തെയും വയോജനത്തെയും ആരോഗ്യപ്രവര്‍ത്തകരെയും സന്നദ്ധപ്രവര്‍ത്തകരെയും പുരോഹിതരെയും പാവപ്പെട്ടവരെയും പണക്കാരെയും എന്നല്ല സര്‍വരെയും മഹാമാരി ഒരുപോലെ ബാധിച്ച കാര്യം ഓര്‍മിപ്പിച്ച അദ്ദേഹം, മഹാമാരിയെയും അതുമൂലമുണ്ടാകുന്ന പ്രതിസന്ധികളെയും മറികടക്കാന്‍ ഒറ്റക്കെട്ടായി പരിശ്രമിക്കണമെന്നും ഉദ്ബോധിപ്പിച്ചു.
