ദൈവിക കരുണയുടെ ഞായറായ ഇന്ന്, തിരുനാള് കുര്ബാന മാര്പാപ്പാ റോമില് പരിശുദ്ധാരൂപിയുടെ നാമത്തിലുള്ള ദേവാലയത്തില് അര്പ്പിക്കും. തുടര്ച്ചയായി ഇത് രണ്ടാം തവണയാണ് ഫ്രാന്സിസ് പാപ്പാ 1994 മുതല് ദൈവിക കാരുണ്യത്തിനു സമര്പ്പിതവും വത്തിക്കാന് സമീപത്തുള്ളതുമായ ഈ ദേവാലയത്തില് ദൈവിക കാരുണ്യ ഞായര് ദിവ്യബലി അര്പ്പിക്കുന്നത്.
പ്രാദേശിക സമയം രാവിലെ 10.30-ന്, ഇന്ത്യന് സമയം ഉച്ചയ്ക്ക് 2 മണിക്ക് വിശുദ്ധ കുര്ബാന ആരംഭിക്കും. കോവിഡ് -19 രോഗപ്രതിരോധ നിയന്ത്രണങ്ങള് നിലവിലുള്ളതിനാല് ഇതില് പങ്കുകൊള്ളുന്ന വിശ്വാസികളുടെ എണ്ണം 80-ല് താഴെയായി നിജപ്പെടുത്തിയിരിക്കുന്നു. തടവുകാര്, ആരോഗ്യപ്രവര്ത്തകര്, അംഗവൈകല്യം സംഭവിച്ചവര്, സിറിയ, നൈജീരിയ ഈജിപ്റ്റ് എന്നിവിടങ്ങളില് നിന്നുള്ള അഭയാര്ത്ഥികള്, കുടിയേറ്റക്കാര് എന്നിവരുടെ പ്രാതിനിദ്ധ്യം ഈ ദിവ്യബലിയില് ഉണ്ടായിരിക്കും.
ദൈവിക കരുണയുടെ ജൂബിലി വര്ഷത്തില് പാപ്പാ പ്രത്യേകം നിയോഗിച്ച ആയിരത്തിലേറെ വരുന്ന കാരുണ്യത്തിന്റെ പ്രേഷിതരായ വൈദികരെ പ്രതിനിധാനം ചെയ്യുന്ന ഏതാനും ദൈവിക കരുണയുടെ പ്രേഷിതവൈദികര് സഹകാര്മ്മികരായിരിക്കും. ഉയിര്പ്പുകാലത്തില് ചൊല്ലുന്ന സ്വര്ല്ലോകരാജ്ഞീ ആനന്ദിച്ചാലും എന്നു തുടങ്ങുന്ന മദ്ധ്യാഹ്നപ്രാര്ത്ഥന പാപ്പാ ഈ ദിവ്യബലിയുടെ അവസാനം നയിക്കുകയും ചെയ്യും.