വെളിച്ചത്തിന് സാക്ഷ്യം നല്‍കാൻ ദൈവം അയച്ച വി. സ്നാപകയോഹന്നാന്റെ വിനയത്തിന്റെ മാതൃക അനുകരിക്കാൻ വിശ്വാസികളെ ക്ഷണിച്ചുകൊണ്ട് ഫ്രാൻസിസ് പാപ്പാ. ദൈവത്തിന്റെ കുഞ്ഞാടിനെ ചൂണ്ടിക്കാണിച്ചവന്റെ എളിയസാക്ഷ്യത്തെ നമുക്ക് അനുകരിക്കാമെന്ന് പാപ്പാ പറഞ്ഞു. സാർവ്വത്രികസഭ എല്ലാ വർഷവും ജൂൺ 24-നാണ് സ്നാപകയോഹന്നാന്റെ ജനനത്തിരുനാൾ ആഘോഷിക്കുന്നത്.
“സ്നാപകന്റെ മദ്ധ്യസ്ഥതയിലൂടെ നമുക്കോരോരുത്തർക്കും സമൃദ്ധമായ കൃപ ലഭിക്കും. മിശിഹായുടെ മുൻഗാമിയായ പ്രവാചകനായിരുന്നു അദ്ദേഹം. അദ്ദേഹം നമ്മുടെ ജീവിതത്തിന് ഒരു ഉത്തേജനമാണ്. ധൈര്യത്തിന്റെ സുവിശേഷമാണ് സ്നാപകൻ പ്രസംഗിച്ചത്. സുവിശേഷത്തിന് ധൈര്യമായി സാക്ഷ്യം വഹിക്കാൻ അദ്ദേഹത്തിൽ നിന്ന് നമുക്ക് കരുത്താർജ്ജിക്കാം” – പാപ്പാ പറഞ്ഞു.
തിരുനാൾ ദിനത്തിന്റെ പ്രത്യേക പ്രാർത്ഥനയും ആശംസയും വിശ്വാസികൾക്ക് നേർന്നുകൊണ്ടായിരുന്നു പാപ്പാ തന്റെ സന്ദേശം അവസാനിപ്പിച്ചത്.
