വി. ഇഗ്നേഷ്യസ് ലയോളയുടെ ആത്മീയവ്യാപാരങ്ങളെക്കുറിച്ച് ഫാ. മിഗുവേല്‍ ഏഞ്ചല്‍ ഫിയോറിറ്റോ എഴുതിയ ‘Seeking and finding the will of God’ എന്ന ബുക്കിന് ഫ്രാന്‍സിസ് പാപ്പാ അവതാരിക എഴുതി. തിങ്കളാഴ്ച പുറത്തുവിട്ട ഒരു വീഡിയോ സന്ദേശത്തില്‍ ഈ ബുക്കിനെക്കുറിച്ച് പാപ്പാ പരാമര്‍ശിക്കുകയും ചെയ്തു.
“ഫാ. മിഗുവേലിന്റെ പുസ്‌കത്തില്‍ നിറഞ്ഞുനില്‍ക്കുന്ന ഒരു വാക്ക് ‘സഹായം’ എന്നതാണ്. വി. ഇഗ്നേഷ്യസിന്റെ ജീവിതത്തിലെ ആത്മീയപ്രവര്‍ത്തനങ്ങളിലേയ്ക്ക് വെളിച്ചം വീശുന്ന ഒരു നിധി തന്നെയാണ് ഈ പുസ്തകം” – പാപ്പാ പറഞ്ഞു. വായനക്കാരന്റെ ജീവിതനവീകരണത്തിന് അത്യധികം സഹായം ചെയ്യുന്ന ഒന്നാണ് ഈ പുസ്തകവും അതിലെ വിവരണവുമെന്നും പാപ്പാ കൂട്ടിച്ചേര്‍ത്തു.
ആത്മാവിന്റെ സ്പന്ദനങ്ങളെ തിരിച്ചറിയാനും ദൈവഹിതം തിരിച്ചറിയാനും സ്വയം രൂപാന്തരം പ്രാപിക്കാനും സഹായിക്കുന്ന കാര്യങ്ങളാണ് വിശുദ്ധന്റെ ജീവിതം ചൂണ്ടിക്കാട്ടി പുസ്തകത്തില്‍ വിവരിക്കുന്നതെന്നും ജീവിതം മെച്ചപ്പെടുത്താനും അതിനായി ആഗ്രഹിക്കുന്നവരെ സഹായിക്കാനും ഈ ബുക്ക് വായനക്കാരെ പ്രാപ്തരാക്കുമെന്നും പാപ്പാ വ്യക്തമാക്കി.
