കർഷകൻ നൽകുന്നത് അധ്വാനത്തിന്റെയും സഹനത്തിന്റെയും സ്നേഹത്തിന്റെയും പ്രതിഫലമാണെന്നും കർഷക ജനതയുടെ ശബ്ദം അവഗണിക്കുന്ന സർക്കാരുകളും രാഷ്ട്രീയ നേതൃത്വങ്ങളും തിരിച്ചടി നേരിടേണ്ടിവരുമെന്നും ചങ്ങനാശേരി ആർച്ച്ബിഷപ് മാർ ജോസഫ് പെരുന്തോട്ടം. ദീപിക ഫ്രണ്ടസ് ക്ലബ് നയിക്കുന്ന കേരള കർഷക ജാഥയുടെ ചങ്ങനാശേരി മേഖലയിലെ സമാപനത്തോടനുബന്ധിച്ച് പെരുന്ന ബസ് സ്റ്റാൻഡ് മൈതാനിയിൽ ചേർന്ന സമ്മേളനം ഉദ്ഘാടനം നിർവഹിച്ചു പ്രസംഗിക്കുകയായിരുന്നു ആർച്ച്ബിഷപ്.
ജനസംഖ്യയിൽ രണ്ടാംസ്ഥാനത്തുള്ള ഭാരതത്തിൽ കാർഷിക ജനതയുടെ മുന്നേറ്റം അവഗണിക്കാനാവില്ല. കാട്ടുമൃഗങ്ങളോടു പടവെട്ടിയും വെല്ലുവിളികളും സാഹസികതയും നേരിടുന്ന കർഷകന്റെ ജീവിതത്തിന് പിന്തുണയും പ്രോത്സാഹനവും നൽകണമെന്നും മാർ പെരുന്തോട്ടം കൂട്ടിച്ചേർത്തു.