വിശുദ്ധിയുടെ ആത്മീയാചാര്യനാണ് കാലംചെയ്ത ബിഷപ് മാർ ജെയിംസ് പഴയാറ്റില്‍ എന്ന് ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ. ഇരിങ്ങാലക്കുട രൂപതയുടെ ശിൽപിയും പ്രഥമ ബിഷപ്പുമായ മാർ ജെയിംസ് പഴയാറ്റിലിന്‍റെ മൂന്നാം ചരമവാർഷികത്തോടനുബന്ധിച്ചു നടന്ന അനുസ്മരണബലി മധ്യേ വചനസന്ദേശം നൽകുകയായിരുന്നു അദ്ദേഹം. ആഴമുള്ള ദൈവാശ്രയബോധത്തിന്റെ ആൾരൂപമായിരുന്നു ജെയിംസ് പിതാവ്. ആത്മാർത്ഥതയുടെയും സത്യസന്ധതയുടെയും കൃത്യതയുടെയും പാഠങ്ങളാണ് ആർദ്രഹൃദയത്തിനുടമയായ അദ്ദേഹം നമ്മെ പഠിപ്പിച്ചത് – മാർ കണ്ണൂക്കാടൻ പറഞ്ഞു.
ഇരിങ്ങാലക്കുട കത്തീഡ്രലിൽ നടന്ന അനുസ്മരണ ദിവ്യബലിക്ക് മാർ പോളി കണ്ണൂക്കാടൻ മുഖ്യകാർമ്മികത്വം വഹിച്ചു. വികാരി ജനറാൾമാരായ മോണ്. ആന്‍റോ തച്ചിൽ, മോണ്. ലാസർ കുറ്റിക്കാടൻ, മോണ്. ജോയ് പാല്യേക്കര, കത്തീഡ്രൽ വികാരി റവ. ഡോ. ആന്‍റു ആലപ്പാടൻ, ഫൊറോന വികാരിമാർ എന്നിവർ സഹകാർമ്മികരായി.
ഇരിങ്ങാലക്കുട രൂപതയിലെ മുഴുവൻ വൈദികരും സന്യസ്ത പ്രതിനിധികളും പാസ്റ്ററൽ കൗണ്‍സിൽ അംഗങ്ങളും ദേവാലയശുശ്രൂഷികളും നടത്തുകൈക്കാരന്മാരും പങ്കെടുത്തു. മാർ പഴയാറ്റിലിന്‍റെ കബറിടത്തിൽ പ്രത്യേക പ്രാർത്ഥനയും തുടർന്ന് സ്നേഹവിരുന്നും നടന്നു.
ചാൻസലർ റവ. ഡോ. നെവിൻ ആട്ടോക്കാരൻ, വൈസ് ചാൻസലർ റവ. ഡോ. കിരൺ തട്ട്‌ള, ഫിനാൻസ് ഓഫീസർ ഫാ. വർഗീസ് അരിക്കാട്ട്, സെക്രട്ടറി ഫാ. ജോയൽ ചെറുവത്തൂർ എന്നിവർ പരിപാടികൾക്ക് നേതൃത്വം നൽകി.
