നോമ്പുകാലം ഇരുപതാം നൂറ്റാണ്ടിലെ വിശുദ്ധരൊപ്പം: 9-ാം ദിനം – കുരിശിന്റെ വി. തെരേസാ ബെനഡിക്ട് (വി. എഡിത്ത് സ്റ്റയിൻ)

“സ്വന്തം കുരിശെടുക്കുക എന്നാൽ അനുതാപത്തിന്റെയും ആത്മപരിത്യാഗത്തിന്റെയും വഴികളിലൂടെ പോവുക എന്നതാണ്” – കുരിശിന്റെ വി. തെരേസാ ബെനഡിക്ട് (വി. എഡിത്ത് സ്റ്റയിൻ – 1891-1942).

ഒരു നലംതികഞ്ഞ തത്വശാസ്ത്രജ്ഞയായി പ്രശസ്തിയുടെ കൊടുമുടിയിൽ നിൽക്കുമ്പോഴാണ്, കുരിശിന്റെ വി. തെരേസാ ബെനഡിക്ട് (വി. എഡിത്ത് സ്റ്റയിൻ) യഹൂദമതത്തിൽനിന്ന് കത്തോലിക്കാ സഭയിലേക്കു മതപരിവർത്തനം നടത്തുകയും കർമ്മലീത്താ സഭയിൽ ചേരുകയുംചെയ്തത്. 1891 ഒക്ടോബർ 12-ന് യഹൂദരുടെ പാപപരിഹാര തിരുനാളായ യോം കിപ്പൂർ (Yom Kippur) ദിനത്തിലാണ് എഡിത്ത് സ്റ്റയിൻ ജനിച്ചത്. രണ്ടു വയസ്സുള്ളപ്പോൾ പിതാവിനെ നഷ്ടപ്പെട്ട അവൾ, യൗവനകാലമെത്തിയെപ്പോഴേക്കും യഹൂദമത ജീവിതത്തിൽനിന്ന് അകന്നു. വളരെയധികം വൈജ്ഞാനിക കഴിവുണ്ടായിരുന്ന എഡിത്ത്, ഫിലോസഫി പഠനത്തിൽ ആകൃഷ്ടയാവുകയും 1913-ൽ പ്രശസ്ത ജർമ്മൻ തത്വചിന്തകൻ എഡ്മണ്ട് ഫുസ്സേലിന്റെ (Edmund Husserl) ശിഷ്യയാവുകയും ചെയ്തു. തത്വശാസ്ത്ര പഠനകാലത്ത് മതകാര്യങ്ങളിൽ താല്പര്യമില്ലായിരുന്നുവെങ്കിലും അവൾ കണ്ടുമുട്ടിയ ക്രൈസ്തവചിന്തകന്മാരുടെ ആത്മീയജീവിതവും ദർശനങ്ങളും അവളിൽ ക്രിസ്തുവിനെക്കുറിച്ചും സഭയെക്കുറിച്ചും ഒരു നല്ല മതിപ്പുണ്ടാക്കി.

1915-ൽ പ്രശസ്തമായ Gottingen University-യിൽ നിന്നും ഉന്നതവിജയം കരസ്ഥമാക്കിയ എഡിത്ത്, ഒന്നാം ലോകമഹായുദ്ധകാലത്ത് ഒരു വർഷം ആസ്ട്രിയിൽ നേഴ്സായി ജോലിചെയ്തു. 1916-ൽ പാഠ്യരംഗത്തേക്കു തിരിച്ചുവന്ന അവൾ phenomenon of empathy എന്ന വിഷയത്തിൽ ഡോക്റേറ്റ് കരസ്ഥമാക്കി. ഈ കാലയളവിൽ സന്യാസ സമർപ്പണചിന്ത അവളിൽ ആഴപ്പെടാൻ തുടങ്ങി. 1921-ൽ തന്റെ കൂട്ടുകാരെ സന്ദർശിക്കുന്നിതിനിടയിൽ ഒരു രാത്രി, പതിനാറാം നൂറ്റാണ്ടിലെ കർമ്മലീത്താ സന്യാസിനി അമ്മത്രേസ്യായുടെ ആത്മകഥ വായിക്കുകയും അതിൽ പറഞ്ഞ കാര്യങ്ങൾ സത്യമാണന്നു തിരിച്ചറിയുകയും ചെയ്തു.

1922 ജനുവരി ഒന്നിന് എഡിത്ത് സ്റ്റയിൻ മാമ്മോദീസാ സ്വീകരിച്ച് കത്തോലിക്കാ സഭയിൽ അംഗമായി. തന്റെ മതപരിവർത്തനത്തിനുശേഷം ഉടൻതന്നെ കർമ്മലീത്താ സഭയിൽ അംഗമാകാൻ ആഗ്രഹിച്ചെങ്കിലും പതിനൊന്നു വർഷംകൂടി കാത്തിരിക്കേണ്ടിവന്നു ആത്യന്തികതീരുമാനത്തിൽ എത്തിച്ചേരാൻ. ഈ കാലയളവിൽ എഡിത്ത് ഒരു ഡൊമിനിക്കൻ സ്കൂളിൽ പഠിപ്പിക്കുകയും സ്ത്രീകളുടെ പ്രശ്നങ്ങളെക്കുറിച്ച് നിരവധി പ്രഭാഷണങ്ങൾ നടത്തുകയും ചെയ്തു. 1931-ൽ തോമസ് അക്വീനാസിന്റെ പഠനങ്ങളെക്കുറിച്ച് പഠിക്കാൻ മാറ്റിവച്ചു. 1932-ൽ യൂണിവേഴ്സിറ്റിയിൽ അധ്യാപനം തുടങ്ങി. 1933-ലെ നാസി ഭരണകൂടത്തിന്റെ ഉദയവും എഡിത്തിന്റെ യഹൂദവംശീയതയും യൂണിവേഴ്സിറ്റിയിലെ അധ്യാപനരംഗത്തിന് അവസാനം കുറിച്ചു.

കത്തോലിക്കാ സഭയിലേക്കുള്ള മതപരിവർത്തനം എഡിത്തിന്റെ അമ്മയ്ക്ക് ഉൾക്കൊള്ളാനാവുന്നതല്ലായിരുന്നു. 1934-ൽ കർമ്മലീത്താ സഭയിൽ അംഗമാവുകയും കുരിശിന്റെ തേരേസാ ബനഡിക്ട് എന്ന നാമം സ്വീകരിക്കുകയും ചെയ്തു. ദൈവത്തിന്റെ മുമ്പിൽ മാധ്യസ്ഥ്യം വഹിക്കുകയാണ് തന്റെ നിയോഗമെന്ന് അവൾ തിരിച്ചറിഞ്ഞു. ജർമ്മനിയിലുള്ള യഹൂദരുടെ ദാരുണവിധി അറിയാമായിരുന്നതുകൊണ്ട് അവർക്കുവേണ്ടി എഡിത്ത് സ്റ്റയിൻ പ്രത്യേകം പ്രാർഥിച്ചിരുന്നു. 1939-ല്‍ കുരിശിന്റെ തെരേസാ ബെനഡിക്ട് ഇപ്രകാരം എഴുതി: “എന്റെ ജീവിതവും മരണവും സ്വീകരിക്കണമേ എന്നു ഞാൻ എന്റെ കർത്താവിനോട് അപേക്ഷിക്കുന്നു. അതുവഴി എന്റെ നാഥൻ എല്ലാ ജനങ്ങളാലും അംഗീകരിക്കപ്പെടുകയും അവിടുത്തെ രാജ്യത്തിന് മഹത്വമുണ്ടാവുകയും ചെയ്യട്ടെ. അങ്ങനെ ജർമ്മനിയുടെ രക്ഷയും ലോകസമാധാനവും ഫലമണീയട്ടെ.”

കുരിശിന്റെ വി. യോഹന്നാനെക്കുറിച്ചുള്ള തന്റെ അവസാന പുസ്തകം “The Science of the Cross, പൂർത്തിയാക്കിയശേഷം തെരേസാ ബെനഡിക്ട് തന്റെ സ്വന്തം സഹോദരി സി. റോസിനോടും മറ്റു സഹോദരിമാരോടും ഒപ്പം 1942 ആഗസ്റ്റ് 7-ന് അറസ്റ്റു ചെയ്യപ്പെട്ടു. നാസികളുടെ യഹൂദരോടുള്ള പെരുമാറ്റം വിമർശിച്ചുകൊണ്ട് ഡച്ച് മെത്രാന്മാർ ഇടയലേഖനം എഴുതിയതിന്റെ പ്രതികാരനടപടിയായിട്ടാണ് അറസ്റ്റ് നടന്നത്. 1942 ആഗസ്റ്റ് ഒൻപതിന് കുരിശിന്റെ തെരേസാ ബനഡിക്ട് രക്തസാക്ഷിത്വം വരിച്ചു. 1998-ൽ ജോൺ പോൾ രണ്ടാമൻ മാർപാപ്പ എഡിത്ത് സ്റ്റയിനെ വിശുദ്ധയും യുറോപ്പിന്റെ സഹമധ്യസ്ഥയുമായി പ്രഖ്യാപിക്കുകയുംചെയ്തു.

കുരിശിന്റെ വി. തെരേസാ ബെനഡിക്ടിനൊപ്പം പ്രാർഥിക്കാം…

കുരിശിന്റെ വി. തെരേസാ ബെനഡിക്ടേ, നിന്റെ ജീവിതവും മരണവും ക്രിസ്തുവിന്റെ കുരിശിനെ പിന്തുടരാൻ എനിക്ക് ശക്തി നൽകുന്നു. ആത്മപരിത്യാഗത്തിന്റെയും അനുതാപത്തിന്റെയും വഴികളിലൂടെ ക്രിസ്തുവിന്റെ കുരിശിലേക്കു വളരാൻ എന്നെ സഹായിക്കണമേ. ആമ്മേൻ.

ഫാ. ജയ്സൺ കുന്നേൽ MCBS

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.