“അവന്‍ വളരുകയും ഞാന്‍ കുറയുകയും വേണം” (യോഹ. 3:30).
ഔന്നത്യത്തിന്റെയും പ്രശസ്തിയുടെയും കൊടുമുടിയിൽ നിൽക്കുമ്പോഴാണ് സ്നാപകയോഹന്നാൻ “അവന്‍ വളരുകയും ഞാന്‍ കുറയുകയും വേണം” (യോഹ. 3:30) എന്ന സാക്ഷ്യം നൽകുന്നത്. കൂടെയുള്ളവരെ എങ്ങനെയും താഴ്ത്തിക്കെട്ടി വലിയവനാകാൻ ശ്രമിക്കുന്ന ആധുനിക സംസ്കാരത്തിൽ, പിന്നാലെയുള്ളവരെ വലിയവരായി കാണുക എന്നത് വലിയ ക്രിസ്തീയസാക്ഷ്യമാണ്.
വലിയവനാകാൻ ആധുനികലോകം ശ്രമിക്കുന്ന മൂന്ന് വഴികളുണ്ട്.
1. ഉപഭോഗാത്മക വളർച്ച (Utiliterian Growth): എങ്ങനെയും മറ്റുള്ളവരുടെ പക്കലുള്ളത് സ്വന്തമാക്കി ഞാൻ എന്നെത്തന്നെ വലുതാക്കുക എന്ന വളർച്ചാരീതിയാണിത്. അതായത് “എനിക്കുള്ളതും എനിക്ക്, നിലയ്ക്കുള്ളതും എനിക്ക്” എന്നതാണ് ഇവരുടെ ചിന്താഗതി.
2. വ്യക്തിപ്രാധാന്യ വളർച്ച (Individualistic Growth): വളരാനും വലുതാകാനും ഓരോരുത്തർ അവരവരുടെ വഴി സ്വീകരിക്കുന്നതാണ് ഈ രീതി. അതായത് “എനിക്ക് എന്റെ വഴി നിനക്ക് നിന്റെ വഴി” എന്ന രീതി. ഇതിൽ മറ്റുള്ളവരുടെ വളർച്ചയ്ക്ക് തടസമൊന്നും ഉണ്ടാക്കുന്നില്ലായെങ്കിലും അവരുടെ ആവശ്യങ്ങളിൽ കണ്ണടയ്ക്കുന്നുവെന്നതിനാൽ അത് ക്രൈസ്തവീയമല്ല.
3. പരോപകാരാത്മക വളർച്ച (Philanthropic Growth):- കത്തിയെരിയുന്ന ഒരു മെഴുകുതിരിയുടെ ചൈതന്യം പോലെ “നിലയ്ക്കുള്ളതും നിനക്ക് എനിക്കുള്ളതും നിനക്ക്” എന്ന ചൈതന്യമാണ് ഈ രീതിയുടെ പ്രത്യേകത. അതായത്, മറ്റുള്ളവർ വലുതാകാൻവേണ്ടി ഞാൻ സ്വയം ചെറുതാകുന്നു. ഇതാണ് സ്നാപകയോഹന്നാന്റെ ജീവിതചൈതന്യം. ഇതാണ് ക്രൈസ്തവീയമായിട്ടുള്ള വളർച്ച.
യോഹന്നാനെപ്പോലെ മറ്റുള്ളവർ വലുതാകാൻ സ്വയം വിട്ടുകൊടുക്കുന്നതാണ് ക്രൈസ്തവീയമായ വളർച്ചയുടെ രീതി. ആമ്മേൻ.
ഫാ. ജെറി വള്ളോംകുന്നേൽ MCBS, സത്താറാ
