ലത്തീൻ സെപ്റ്റംബർ 25 ലൂക്കാ 8:19-31  “വിശ്വാസ-ബന്ധം”

അവന്‍ പറഞ്ഞു: ദൈവവചനം ശ്രവിക്കുകയും അതനുസരിച്ചു പ്രവര്‍ത്തിക്കുകയുംചെയ്യുന്നവരാണ്‌ എന്‍െറ അമ്മയും സഹോദരരുംലൂക്കാ 8 : 21

ബന്ധങ്ങളെ യേശു നിർവചിക്കുന്ന രീതി തികച്ചും വ്യത്യസ്തമാണ്. മനുഷ്യ ബന്ധങ്ങളെ, പ്രത്യേകിച്ച് കുടുംബബന്ധങ്ങളെ കുറിച്ച് പൊതുവായുള്ള ധാരണകൾക്കും അർത്ഥങ്ങൾക്കും [പിതൃത്വം, മാതൃത്വം, ഭ്രാതൃത്വം] അപ്പുറം വിശാലമായ സാധ്യതകളിലേക്ക് യേശുനാഥൻ വെളിച്ചംവീശുകയാണ്.

ഉദാഹരണത്തിന് അടുത്ത് വസിക്കുന്നവൻ അയൽക്കാരൻ എന്ന ധാരണക്കും അപ്പുറം “ആവശ്യങ്ങളിൽ  സഹായഹസ്തം നീട്ടുന്നവൻ അയൽക്കാരൻ” എന്ന് നല്ലസമറായക്കാരൻ്റെ ഉപമയുടെ യേശു നിർവചിക്കുന്നു.  ദൈവം ഒരു ശക്തിയാണ് എന്ന പഴയനിയമ നിർവചനങ്ങളെ തിരുത്തി ദൈവം സ്നേഹമാണ് (സ്നേഹ പിതാവാണ്)എന്ന പുതിയ നിർവചനം നൽകുന്നു. അതുപോലെ,  പിതാവ്, മാതാവ്, പുത്രൻ, പുത്രി എന്നിവർ ഒരു കൂരക്ക് കീഴെ കിടക്കുന്നവർ എന്നതിനും അപ്പുറം ദൈവ വചനങ്ങൾഅനുസരിക്കുന്നവരാണ് എന്ന് യേശു നിർവചിക്കുന്നു.

രക്തം വെള്ളത്തേക്കാൾ ശക്തിയുള്ളതാണ് എന്ന് പറയുന്നതുപോലെ രക്തബന്ധങ്ങൾ (കുടുംബബന്ധങ്ങൾ) ജലബന്ധങ്ങളെക്കാൾ (സാമൂഹ്യബന്ധങ്ങൾ) ശക്തമാണ്. എന്നാൽ ദൈവവുമായുള്ള ബന്ധത്തിന്റെ അടിസ്ഥാനമായ “വിശ്വാസം” (Faith) അടിസ്ഥാനമായുള്ള ആത്മീയ ബന്ധങ്ങൾ ഒരിക്കലും തക്കപെടാൻ സാധ്യമല്ലാത്ത വിധം ശക്തമാണ്.ആമ്മേൻ. 

ഫാ. ജെറി വള്ളോംകുന്നേൽ MCBS, സോളാപ്പൂർ

വായനക്കാരുടെ അഭിപ്രായങ്ങൾ താഴെ എഴുതാവുന്നതാണ്.