ഉന്നത വിദ്യാഭ്യാസരംഗത്തും സാമ്പത്തിക പഠനരംഗത്തും സജീവമായി നിൽക്കുന്ന യുവജനങ്ങളെ ഒരുമിച്ചുചേർത്ത് അതതു മേഖലകളിൽ അവർക്കുള്ള അറിവ് യുവജനങ്ങൾക്കും സമൂഹത്തിനും പൊതുവായി ലഭ്യമാക്കുക എന്ന ലക്ഷ്യത്തോടെ കെസിവൈഎം സംസ്ഥാന സമിതി രൂപം നൽകിയ ഉന്നത വിദ്യാഭ്യാസ- സാമ്പത്തിക കാര്യ ഗവേഷകവിഭാഗ ഫോറത്തിനു തുടക്കമായി.
ഫോറത്തിന്റെ പ്രഥമ സമ്മേളനം പിഒസി-യിൽ കോട്ടപ്പുറം ബിഷപ് ഡോ. ജോസഫ് കാരിക്കശേരി ഉദ്ഘാടനം ചെയ്തു. അറിവാണ് ഒരാളെ നല്ല മനുഷ്യനാക്കി മാറ്റുന്നതെന്നും അറിവിന്റെ തലങ്ങൾ തേടുന്നവരാകണം യുവജനങ്ങളെന്നും ബിഷപ് ഡോ. ജോസഫ് കാരിക്കശേരി പറഞ്ഞു.
കെസിവൈഎം സംസ്ഥാന പ്രസിഡന്റ് സിറിയക് ചാഴിക്കാടൻ അധ്യക്ഷത വഹിച്ചു. സംസ്ഥാന ഡയറക്ടർ ഫാ. സ്റ്റീഫൻ തോമസ് ചാലക്കര ആമുഖപ്രഭാഷണം നടത്തി. കെസിബിസി ഡെപ്യൂട്ടി സെക്രട്ടറി ജനറൽ ഫാ. വർഗ്ഗീസ് വള്ളിക്കാട്ട് ആശംസകൾ നേർന്നു.
തെയോഫിലോസ് കോളജ് പ്രിൻസിപ്പലും മുൻ കെസിവൈഎം സെനറ്റ് മെമ്പറുമായിരുന്ന പ്രഫ. ഡോ. കെ.വൈ. ബെനഡിക്ട് ഉന്നത വിദ്യാഭ്യാസ-സാമ്പത്തിക രംഗങ്ങളിലെ നൂതന ആശയങ്ങളെക്കുറിച്ച് ക്ലാസ് നയിച്ചു.