കോട്ടയം അതിരൂപതയുടെ വനിതാ അത്മായ സംഘടനയായ ക്‌നാനായ കാത്തലിക് വിമൺസ് അസ്സോസിയേഷന്റെ നേതൃത്വത്തിൽ ആഗസ്റ്റ് 28 വെള്ളിയാഴ്ച, ഉച്ചകഴിഞ്ഞ് 3 മണിക്ക് അതിരൂപതാതല ഓൺലൈൻ വനിതാസംഗമം സംഘടിപ്പിക്കും. അതിരൂപതയിലെ എല്ലാ യൂണിറ്റുകളിലെയും കെ.സി.ഡബ്ല്യൂ.എ അംഗങ്ങൾ സൂം വീഡിയോ കോൺഫറൻസ് വഴിയായി സംഗമത്തിൽ പങ്കെടുക്കും.
അതിരൂപതാ പ്രസിഡന്റ് മേഴ്‌സി ജോണിന്റെ അദ്ധ്യക്ഷതയിൽ ചേരുന്ന സംഗമം അതിരൂപതാ മെത്രാപ്പോലീത്ത മാർ മാത്യു മൂലക്കാട്ട് ഉദ്ഘാടനം ചെയ്യും. അതിരൂപതാ സഹായമെത്രാൻ മാർ ജോസഫ് പണ്ടാരശ്ശേരിൽ അനുഗ്രഹപ്രഭാഷണവും വികാരി ജനറാൾ ഫാ. മൈക്കിൾ വെട്ടിക്കാട്ട് ആമുഖസന്ദേശവും നൽകും.
അതിരൂപതാ സെക്രട്ടറി സിൻസി പാറയിൽ, മലബാർ റീജിയൺ പ്രസിഡന്റ് ജെയ്‌നമ്മ മുളവേലിപ്പുറം എന്നിവർ ആശംസകളർപ്പിക്കും. അതിരൂപത ഭാരവാഹികൾ, വർക്കിംഗ് കമ്മിറ്റി അംഗങ്ങൾ, യൂണിറ്റ് ഭാരവാഹികൾ എന്നിവർ സംഗമത്തിന് നേതൃത്വം നൽകും.
