ഭരണഘടന ഉറപ്പുനൽകുന്ന മതേതര, ജനാധിപത്യമൂല്യങ്ങൾ സംരക്ഷിക്കാൻ ഓരോരുത്തരും ഉണർന്നു പ്രവർത്തിക്കണമെന്ന് കെ സി ബി സി പ്രസിഡന്‍റ് ആർച്ച്ബിഷപ് ഡോ.എം. സൂസപാക്യം. കേരള സഭയും സമൂഹവുമായി ബന്ധപ്പെട്ട വിവിധ വിഷയങ്ങളും രാഷ്‌ട്രീയ സാമൂഹിക സാഹചര്യങ്ങളും മൂന്നു ദിവസമായി എറണാകുളം പിഒസിയിൽ നടന്ന കെസിബിസി വർഷകാല സമ്മേളനം ചർച്ചചെയ്തതായി കെസിബിസി പ്രസിഡന്‍റ് ആർച്ച്ബിഷപ് ഡോ.എം. സൂസപാക്യം പറഞ്ഞു.
രാജ്യത്തിന്‍റെ അടിസ്ഥാനസ്വഭാവത്തെ നിർണയിക്കുകയും നിർവചിക്കുകയും ചെയ്യുന്ന ഭരണഘടനാവകുപ്പുകൾ സംരക്ഷിക്കപ്പെടണം. അവയ്ക്കുനേരേ ഉയരുന്ന ഭീഷണികൾ രാഷ്‌ട്രത്തിന്‍റെ നിലനില്പിനു നേരേയുള്ള ഭീഷണിയാണെന്നും രാഷ്‌ട്രീയാധികാരത്തിലേക്കുള്ള എളുപ്പവഴിയായി വിവിധ ജനവിഭാഗങ്ങൾക്കിടയിൽ വിദ്വേഷവും അനാവശ്യ ഭയാശങ്കകളും സൃഷ്ടിക്കുന്നതും ധ്രുവീകരണം നടത്തുന്നതും അപകടകരമാണെന്നു കെസിബിസി ചൂണ്ടിക്കാട്ടി.
വൈവിധ്യത്തിൽ ഐക്യപ്പെട്ട് കാരുണ്യദൗത്യത്തിലൂടെ ക്രൈസ്തവസാക്ഷ്യം നൽകാനുള്ള സിബിസിഐ ആഹ്വാനത്തിന്‍റെ വെളിച്ചത്തിൽ നടപ്പാക്കേണ്ട പദ്ധതികൾക്കു സമ്മേളനം രൂപം നല്കി.
